Ballkani është ndalur në barazim 1-1 nga Dukagjini i Klinës.
Mysafirët më mirë e nisën ndeshjen, kur në minutën e 18-të fituan penallti pasi Lorenc Trashi e pengoi në zonë Iljesa Zulfiun.
I saktë nga pika e bardhë ishte Otto John që realizoi për 0-1. Ballkani shtoi trysninë duke krijuar disa raste të mira shënimi, por pa sukses.
Kësisoj 45 minutat e para të kësaj sfide u mbyllën me epërsinë minimale të mysafirëve 0-1.
Por klinasit nuk arritën ta mbanin epërsinë më shumë se nëntë minuta në pjesën e dytë, kur Albion Rrahmani realizoi me kokë për 1-1 pas asistimit nga Nazmi Gripshi.
Ballkani vazhdoi me sulme deri në fund të ndeshjes duke tentuar me Rrahmanin, Gripshin, Potokun e Korenicën, por pa arritur të gjenin golin e fitores.
Kësisoj sfida në Suharekë u mbyll me rezultat të barabartë 1-1.
Ballkani vazhdon të mbetet në krye të tabelës me 48 pikë, derisa Dukagjini është në vendin e gjashtë me 26 sosh.
Në xhiron e 23-të Ballkani do të ketë punë me Prishtinën në udhëtim, derisa Dukagjini para tifozëve të vet pret Gjilanin.
Prishtina shijon fitoren e parë në pranverë, mposht Llapin në udhëtim
Prishtina ka triumfuar në udhëtim te Llapi me rezultat 2-0 në ndeshjen derbi të vlefshme për javën e 22-të në Albi Mall Superligën e Kosovës.
Ekipi i Ismet Munishit ka shijuar fitoren e parë në pranverë, pasi ka mposhtur Llapin e Tahir Batatinës, pas tri humbjeve radhazi.
Pjesa e parë e ndeshjes u duke si e barabartë për nga rastet dhe tentativat, por diferenca ishte se Prishtina shënoi dy gola.
Goli i parë i ndeshjes erdhi në minutën e 41-të me anë të Albin Prapashtinës, i cili shënoi një gol të bukur për 0-1, ndërsa Endrit Krasniqi (45+) shënoi për 0-2 pas një top i portierit Ilir Avdyli e goditi në këmbë dhe përfundoi në rrjetën.
Në pjesën e dytë, vendasit provuan më të gjitha forcat për t’u kthyer në lojë duke rrezikuar kohe pas kohe dhe duke krijuar raste.
Megjithatë, Prishtina u mbrojt mirë, rrezikoi gjithashtu me kundërsulme, por pa arritur asnjëra skuadër të tund rrjetën dhe ndeshja u mbyll me fitoren e mysafirëve 2-0.
Pas kësaj fitore, kryeqytetasit e shohin veten në pozitën e katërt me 30 pikë, ndërsa llapjanët një pozitë më poshtë me 29 pikë.
Në ndeshjen e radhës, Prishtina e pret Ballkanin, teksa Llapi udhëton te Drita.
