Fjalimi i kryeministrit slloven Janez Janša në festimin shtetëror të Ditës së Sovranitetit në Koper u ndërpre nga fishkëllimat dhe britmat e protestuesve. Policia u detyrua të ndërhynte, raporton agjencia sllovene STA.
Policia i paralajmëroi demonstruesit, të cilët ishin mbledhur pranë vendit të festimit, nëpërmjet megafonave që të largoheshin dhe të mos e prishnin eventin. Një oficer policie i tha gjithashtu turmës se tubimi po fotografohej dhe filmohej.
“Sot, Sllovenia është e sigurt dhe siguria është kushti kryesor për stabilitetin, dhe rrjedhimisht për prosperitetin ekonomik”, tha Jansha në një fjalim, raporton STA.
Jansha tha gjithashtu se në vitet e para të pavarësisë, Sllovenia ishte në rrugën e duhur për t’u bërë një “Zvicër e dytë”, por se pasuan vite me mundësi të humbura. Ai gjithashtu kritikoi ashpër kundërshtarët politikë.
Në festim nuk mori pjesë presidentja Natasha Pirc Musar apo përfaqësues të opozitës. Pirc Musar anuloi pjesëmarrjen e saj sepse nuk është dakord me disa lëvizje të qeverisë dhe më vonë i kritikoi fishkëllimat gjatë fjalimit të saj në rrjetin X.
Çështja më e diskutueshme ishte emri i përkujtimit. Qeveria e quajti atë 35-vjetori i çlirimit të Sllovenisë, gjë që kundërshtohet nga presidenti dhe partitë opozitare Lëvizja për Liri, e Majta dhe Social Demokratët.
Festimi shënon 26 tetorin e vitit 1991, kur anëtari i fundit i Ushtrisë Popullore Jugosllave u largua nga Sllovenia pas luftës dhjetëditore. Përveç shumicës së ministrave nga qeveria e Janšës, të pranishëm ishin edhe anëtarë të qeverisë së parë sllovene, përfshirë kryeministrin e atëhershëm Lojze Peterle dhe ministrat Dimitrij Rupel dhe Igor Bavčar.
