Shtetet e Bashkuara, Rusia dhe Ukraina do të rifillojnë bisedimet për t’i dhënë fund luftës në Ukrainë të martën dhe të mërkurën në Abu Dhabi, pas një ndërprerjeje prej më shumë se tetë muajsh.
Presidenti i SHBA-së, Donald Trump, kohët e fundit rriti pritshmëritë për një marrëveshje paqeje të afërt duke komentuar mbi “marrëveshjen e madhe dhe të bukur” që pritet të arrihet së shpejti.Megjithatë, vëzhguesit nuk presin shumë përparim nga ky raund negociatash.
SHBA-të do të përfaqësohen nga i dërguari special Steve Witkoff dhe dhëndri i Trump, Jared Kushner.Takimi i fundit trepalësh u zhvillua në shkurt në Gjenevë, pas dy takimeve të mëparshme në Abu Dhabi.
Komisioni Evropian tha se përfaqësues të Bashkimit Evropian do të jenë gjithashtu të pranishëm në Abu Dhabi, por nuk u sqarua se në çfarë mënyre do të marrin pjesë.
“Çdo diskutim kuptimplotë mbi arkitekturën e sigurisë evropiane mund të fillojë vetëm pasi të jetë arritur një armëpushim në Ukrainë”, tha të hënën Presidentja e Komisionit, Ursula von der Leyen.”Dhe kjo duhet të zhvillohet në një format të përshtatshëm dhe veçanërisht me aleatët e NATO-s dhe anëtarët e BE-së”, shtoi ajo.Zëdhënësi i Kremlinit, Dmitry Peskov, tha të hënën në Moskë se bisedimet po vazhdojnë në një formë “trepalëshe” me ndërmjetësimin e SHBA-së dhe se BE-ja nuk do të jetë në tryezën e negociatave në Abu Dhabi.
Delegacioni ukrainas kryesohet nga kreu i shërbimit të inteligjencës së jashtme, Rustem Umerov, dhe delegacioni rus kryesohet nga ish-Ministri i Kulturës Vladimir Medinsky, asistent i Presidentit rus Vladimir Putin.Shenjat e gatishmërisë për kompromis
Një zyrtar amerikan i paidentifikuar tha të hënën se Rusia dhe Ukraina po tregojnë njëfarë gatishmërie për të bërë kompromis mbi një shkëmbim të mundshëm territori në bisedimet joformale.
Zyrtari, i cili informoi gazetarët përpara bisedimeve që filluan të martën, tha se një nga çështjet kryesore do të ishin garancitë e sigurisë për Ukrainën, duke përfshirë mundësinë e ofrimit të mbrojtjes për Kievin, të modeluar sipas Nenit 5 të Traktatit të Atlantikut të Veriut, i cili parashikon mbrojtje kolektive nga anëtarët e NATO-s.
Ukraina dhe Rusia deri më tani kanë mbajtur pretendime të forta territoriale. Ukraina po kërkon tërheqjen e forcave ruse në kufijtë e njohur ndërkombëtarisht, ndërsa presidenti rus Vladimir Putin po kërkon kontroll mbi të gjithë rajonin e Donbasit.
Megjithatë, një zyrtar amerikan tha se të dyja palët po tregonin shenja të gatishmërisë për kompromis në bisedimet me dyer të mbyllura.
Ai shtoi se ekziston mundësia që të dërguarit amerikanë të udhëtojnë në Rusi për një takim me Putinin pas negociatave.Edhe pse paralajmëroi se negociatat do të kërkonin kohë, ai shprehu optimizëm të kujdesshëm nga Uashingtoni në lidhje me mundësinë e arritjes së përparimit.
