Ushtria ruse njoftoi të hënën në mëngjes se njësitë e saj të mbrojtjes ajrore rrëzuan 148 dronë ukrainas në një periudhë tre-orëshe, ndërsa zyrtarët raportuan se furnizimi me energji elektrike po rikthehej në gati gjysmë milioni familje për shkak të ndërprerjeve që lidhen me sulmet ajrore.
Një deklaratë nga Ministria e Mbrojtjes Ruse tha se njësitë e mbrojtjes ajrore kapën 148 dronë midis orës 8 të mbrëmjes dhe 11 të mbrëmjes të dielën.
Kryetari i bashkisë së portit rus të Novorossiysk në Detin e Zi, Andrei Kravchenko, raportoi se mbetjet e dronit goditën një ndërtesë banimi shumëkatëshe. Aktualisht nuk ka informacione për viktima.
Megjithatë, guvernatori i Sevastopolit raportoi se qyteti port në gadishullin e aneksuar të Krimesë iu nënshtrua sulmeve nga katër dronë gjatë ditës dhe se shtatë të tjerë u rrëzuan në valën e fundit.Gjithashtu në rajonin e pushtuar të Donetskut në Ukrainën lindore, kreu i qeverisë së vetëshpallur,
Andrey Chertkov, tha se shërbimet e emergjencës kishin rikthyer energjinë elektrike në dy qytete të mëdha, Donetsk dhe Makiivka, pas sulmeve ukrainase në infrastrukturën energjetike. Chertkov kishte thënë më parë se gati gjysmë milioni familje ishin pa energji elektrike.
Shërbimet po punonin gjithashtu për të rivendosur furnizimin me energji elektrike pas ndërprerjeve masive në zonat e kontrolluara nga Rusia në rajonin e Zaporizhias, raporton Reuters.
Agjencia raportoi gjithashtu se të dielën në mbrëmje një dron vrau një vullnetar të mbrojtjes civile në rajonin kufitar rus të Belgorodit, një objektiv i shpeshtë i ushtrisë ukrainase.
