Shtetet e Bashkuara kanë ngadalësuar shitjen e aseteve të gjigantit rus të naftës Lukoil për të ushtruar presion mbi Rusinë në bisedimet e paqes me Ukrainën , sipas katër burimeve të cituara nga Reuters.
Sot, Zyra Amerikane e Kontrollit të Aseteve të Huaja (OFAC) do të zgjasë afatin e 28 shkurtit deri më 1 prill për arritjen e marrëveshjeve, sipas një dokumenti të OFAC të parë nga Reuters.
Zyrtarët nga qeveritë e SHBA-së, Rusisë dhe Ukrainës nuk kanë bërë përparim në bisedimet në Gjenevë, Abu Dhabi dhe Miami në javët e fundit për të negociuar një marrëveshje paqeje në Ukrainë.
Këto diskutime përfshinin sanksionet e SHBA-së ndaj prodhuesit më të madh të naftës në Rusi, Rosneft në pronësi të shtetit , si dhe prodhuesit të dytë më të madh Lukoil , sipas tre burimeve të njohura me takimet.
Raundi i ardhshëm i bisedimeve midis SHBA-së, Rusisë dhe Ukrainës është planifikuar për në mars .Që kur Uashingtoni vendosi sanksione ndaj dy kompanive ruse të naftës në tetor, OFAC e ka zgjatur tashmë afatin tre herë për blerësit potencialë për të negociuar me Lukoil për asetet e saj me vlerë 22 miliardë dollarë.
Një zyrtar amerikan tha se Departamenti i Thesarit e zgjati afatin për të “lehtësuar negociatat e vazhdueshme me Lukoil dhe për të arritur një marrëveshje që mbështet përpjekjet e Presidentit Trump për ta privuar Rusinë nga të ardhurat që i nevojiten për të mbështetur makinën e saj të luftës”.
Sanksionet kanë detyruar shitjen e portofolit ndërkombëtar të Lukoil, i cili përfshin fusha nafte, rafineri dhe stacione benzine nga Iraku në Finlandë . Shitja ka tërhequr interesin e më shumë se një duzine ofertuesish, nga gjiganti amerikan i naftës ExxonMobil deri te ish-pronari i faqes së internetit pornografike Pornhub.
OFAC po merrej me shitjen e aseteve të Lukoil, por procesi kohët e fundit u përshkallëzua duke përfshirë zyrtarë të lartë nga Shtëpia e Bardhë, Departamenti i Thesarit dhe Departamenti i Shtetit, me Sekretarin e Thesarit Scott Besant të përfshirë më ngushtë, sipas tre burimeve.
