Mediat izraelite raportojnë se Udhëheqësi Suprem i Iranit, Ali Khamenei, është vrarë, gjë që një zyrtar i lartë izraelit, i paidentifikuar, e konfirmoi për Reuters. Ai tha se trupi i tij u gjet.
Informacioni rreth vdekjes së Ajatollah-ut u publikua nga shumë media izraelite, si dhe nga agjencia e lajmeve Reuters, e cila deklaron se një zyrtar izraelit u tha atyre se kishin gjetur trupin e Khameneit.
Reuters deklaron gjithashtu se ende nuk ka konfirmim iranian për vdekjen e ajatollahut dhe publikoi një deklaratë nga kreu i Zyrës së Marrëdhënieve me Publikun të Liderit Suprem, në të cilën ai tha “armiku po përdor një luftë mendore, të gjithë duhet të jenë të vetëdijshëm për këtë”. Ai aludoi kështu se lajmi izraelit për vdekjen e Khameneit ishte propagandë.
Jo shumë kohë pasi Izraeli dhe SHBA-të nisën një sulm ndaj Iranit këtë mëngjes, ato njoftuan se kompleksi ku ndodhet Ali Khamenei u godit. Ministri i jashtëm i Iranit pretendoi se Ajatollah ishte gjallë, ndërsa burimet izraelite qarkulluan vazhdimisht informacione rreth vdekjes së tij të mundshme.
Janë publikuar video dhe foto që tregojnë ndërtesat e shkatërruara në kompleksin e Ajatollahut, por askush nuk e ka konfirmuar zyrtarisht se ai ishte realisht atje në kohën e sulmit.
Ajatollah Ali Khamenei (86) ka sunduar Iranin që nga viti 1989. Si udhëheqës suprem, ai ka autoritet përfundimtar mbi të gjitha degët e qeverisë, ushtrinë dhe gjyqësorin në Iran.
Gjatë gati katër dekadave, Khamenei ndërtoi një fuqi rajonale për të rivalizuar shtetet myslimane sunite përtej Gjirit, ndërsa promovonte teknologjinë bërthamore që alarmoi Izraelin dhe SHBA-në.
