Pas sulmeve të gjera izraelito-amerikane të mëngjesit të sotëm ndaj objekteve kryesore ushtarake, të inteligjencës dhe bërthamore iraniane, erdhi përgjigja e paralajmëruar nga Teherani. Sipas informacioneve të para, Irani nisi valën e parë të raketave balistike drejt territorit të Izraelit dhe raportet flasin për të paktën 30 raketa të lëshuara.Sirenat e sulmeve ajrore u dëgjuan në të gjithë Izraelin verior. Paralajmërimet për sulme me raketa dhe shpërthime u aktivizuan në rajonet e Lartësive veriore të Golanit, në zonën e vijës ndarëse, në Galile, në Karmel dhe në zonën e Gjirit.
Forcat Mbrojtëse të Izraelit (IDF) kanë konfirmuar se kanë identifikuar raketa të lëshuara nga Irani që shkojnë drejt Izraelit, duke shkaktuar alarme në shumë pjesë të vendit.
“Publikut i kërkohet të ndjekë udhëzimet nga Komanda e Frontit të Brendshëm. Aktualisht, Forcat Ajrore Izraelite po operojnë për të kapur dhe goditur kërcënimet kudo që është e nevojshme për t’i eliminuar ato”, tha ushtria izraelite në një deklaratë emergjence.
IDF gjithashtu u dërgoi një paralajmërim dramatik qytetarëve të saj, duke theksuar seriozitetin e situatës: “Mbrojtja jonë nuk është hermetike dhe për këtë arsye është me rëndësi thelbësore që publiku të vazhdojë t’i përmbahet në mënyrë strikte udhëzimeve të Komandës së Frontit të Brendshëm”.
Ky sulm me raketa përfaqëson një hakmarrje të drejtpërdrejtë dhe të shpejtë për sulmet e pashembullta të kryera më herët sot nga Izraeli dhe Shtetet e Bashkuara të Amerikës thellë brenda territorit të Iranit.
Le të kujtojmë se dhjetëra sulme ajrore u kryen në të gjithë Iranin me pjesëmarrjen e avionëve luftarakë që u ngritën nga bazat në të gjithë Lindjen e Mesme dhe nga transportuesit amerikanë të avionëve.
