Kryebashkiaku i Nju Jorkut, Zohran Mamdani, dënoi atë që e quajti “një përshkallëzim katastrofik në një luftë të paligjshme agresioni”.Në një deklaratë të postuar në mediat sociale, kryebashkiaku i Nju Jorkut dënoi sulmet ndaj Iranit dhe u përpoq t’i siguronte banorët iranianë të Nju Jorkut se do të ishin të sigurt në qytet.
“Sulmet ushtarake të sotme ndaj Iranit, të kryera nga Shtetet e Bashkuara të Amerikës dhe Izraeli, shënojnë një përshkallëzim katastrofik në një luftë të paligjshme agresioni. Bombardimi i qyteteve. Vrasja e civilëve. Hapja e një fushëbeteje të re. Amerikanët nuk e duan këtë. Ata nuk duan një luftë tjetër në përpjekje për të ndryshuar regjimin. Ata duan lehtësim nga kriza. Ata duan paqe”, tha ai.
Pastaj iu drejtua qytetarëve të tij.
“Jam i përqendruar në sigurimin që çdo banor i New Yorkut të jetë i sigurt. Kam qenë në kontakt me komisionerin tonë të policisë dhe zyrtarët e menaxhimit të emergjencave. Po ndërmarrim hapa proaktivë, duke përfshirë rritjen e koordinimit ndëragjencor dhe shtimin e patrullave të vendeve të ndjeshme si masë paraprake. Përveç kësaj, dua t’u flas drejtpërdrejt banorëve iranianë të New Yorkut: Ju jeni pjesë e strukturës së këtij qyteti, ju jeni fqinjët tanë, pronarët e bizneseve të vogla, studentët, artistët, punëtorët dhe udhëheqësit e komunitetit. Do të jeni të sigurt këtu”, u tha ai atyre.
