Mbrëmja e fundit e Festivalit të Muzikës në Sanremo u hap me një përmbledhje të situatës ndërkombëtare, në dritën e sulmit ndaj Iranit, dhe një apel për fëmijët, veçanërisht ata që jetojnë në zona lufte.
Konkretisht, prezantuesit e natës finale, Giorgia Cardinaletti, Carlo Conti dhe Laura Pausini, fillimisht vunë në dukje luftën midis Iranit dhe Izraelit.
“Mirëmbrëma të gjithëve. Nata e fundit e Festivalit të Sanremos është gati të fillojë, por së pari, unë, Laura dhe Giorgia duam të reflektojmë mbi atë që po ndodh”, filloi Conti.
Cardinaletti thekson se kjo është një histori komplekse që mbart brenda saj një kontradiktë të madhe.
“Është një histori komplekse që mbart një kontradiktë të madhe. Nga njëra anë, ne duam që populli iranian të jetë i lirë nga shtypja dhe vuajtjet, nga ana tjetër, po zhvillohet një konflikt, rezultatin e të cilit nuk e dimë. Misioni ynë është të përpiqemi të kuptojmë dhe t’ju përcjellim se çfarë do të ndodhë. Ne e kemi bërë këtë që nga mëngjesi i hershëm dhe do të vazhdojmë ta bëjmë këtë falë punës së korrespondentëve që merren me realitetet e luftës, madje edhe duke rrezikuar jetën e tyre”, shtoi Cardinaletti.
Prezantuesi Conti, i cili është edhe drejtor artistik i Festivalit, theksoi se nuk kishte kuptim ta fshihte situatën.
“Po përjetojmë një kontradiktë. Nga njëra anë, duam të festojmë muzikën italiane, por nuk mund ta injorojmë atë që po ndodh në botë. Kjo është arsyeja pse duam të ndajmë apelin e UNICEF-it: çdo vit 500 milionë fëmijë preken në 56 zona konflikti, prandaj duam të bëjmë thirrje për një angazhim global për të mbrojtur fëmijët kudo që janë”, tha ai.
Laura Pausini e përfundoi fjalimin e saj duke vënë theksin te të drejtat e fëmijëve dhe tha se fëmijët kanë të drejtë të jetojnë në paqe.
“Fëmijët kanë të drejtë të jetojnë në paqe, të flenë për të ëndërruar dhe jo të ëndërrojnë për të fjetur sepse zhurma e bombave i zgjon dhe i detyron të ikin. Mjaft me urrejtjen, le ta fillojmë festivalin”, tha Pausini.
Ju kujtojmë se në edicionin e 76-të të Festivalit të Sanremos, fitoren e mori Sal Da Vinci me këngën “Per semper si”, e cila, pas pesë netësh garuese dhe superfinales, siguroi trofeun dhe mundësinë për të përfaqësuar Italinë në Festivalin e Këngës në Eurovision të këtij viti në Vjenë.
