Sekretari i Mbrojtjes i SHBA-së, Pete Hegseth, tha se trupat amerikane nuk janë aktualisht të vendosura në territorin iranian, por ai nuk pranoi të komentojë mbi lëvizjet e mundshme të ardhshme nga Uashingtoni.Kur një gazetar në Pentagon e pyeti nëse aktualisht ka “ushtarë amerikanë në territorin e Iranit”, Hegseth u përgjigj shkurt “jo” dhe shtoi menjëherë se administrata e Presidentit të SHBA-së, Donald Trump, nuk do të deklarojë publikisht se çfarë planifikon të bëjë.
“Nuk do të hyjmë në atë që do të bëjmë ose nuk do të bëjmë”
“Nuk do të hyjmë në atë që do të bëjmë ose nuk do të bëjmë. Mendoj se është një keqkuptim, një keqkuptim që ka vazhduar për një kohë të gjatë, se ky departament ose presidentët duhet t’u thonë popullit amerikan, por edhe armiqve tanë: ja saktësisht çfarë do të bëjmë, sa gjatë do të shkojmë dhe sa larg do të shkojmë. Kjo është e pakuptimtë”, tha Hegseth.
“Do të shkojmë aq larg sa të jetë e nevojshme”
Ministri tha se Trump dëshiron që kundërshtarët e Amerikës të dinë se SHBA-të do të bëjnë çfarëdo që e konsiderojnë të nevojshme për të mbrojtur interesat e tyre.
“Presidenti Trump po sigurohet që armiqtë tanë të kuptojnë se ne do të shkojmë aq larg sa është e nevojshme për të çuar përpara interesat amerikane. Por nuk do të jemi budallenj për këtë”, tha ai.
Ai shtoi se për të arritur qëllimet, nuk është e nevojshme të dërgohen “200,000 njerëz dhe të qëndrojnë për 20 vjet”, duke aluduar në angazhimet ushtarake afatgjata të SHBA-së në Irak dhe Afganistan.
“Ne kemi treguar se qëllimet që çojnë përpara interesat amerikane mund të arrihen pa marrëzi. A do të jemi vendimtarë? A jemi të gatshëm të jemi vendimtarë? A investojmë muaj e muaj planifikimi për të kuptuar se çfarë lloj efektesh duam të arrijmë? Absolutisht”, tha Hegseth.
Së fundmi, ai tha se SHBA-të nuk do t’i zbulonin planet e tyre ushtarake paraprakisht.
“Pse në botë do t’ju thoshim juve, armikut apo kujtdo qoftë, se çfarë do të bëjmë ose nuk do të bëjmë për të arritur qëllimin tonë? Ne po luftojmë për të fituar. Ne po luftojmë për të arritur qëllimet e vendosura nga Presidenti i Shteteve të Bashkuara. Dhe do ta bëjmë këtë pa kërkuar falje”, përfundoi ministri i mbrojtjes.
