Një zyrtar i lartë ushtarak iranian ka thënë se ky vend do të sulmojë të gjitha qendrat ekonomike të Lindjes së Mesme nëse Izraeli dhe Shtetet e Bashkuara të Amerikës vazhdojnë sulmet e tyre ndaj Iranit.
Gjenerali i Gardës Revolucionare Islamike të Iranit, Ebrahim Jabbari, paralajmëroi sot se sulmet e vazhdueshme SHBA-Izrael do të çojnë në hakmarrjen e Iranit kundër “të gjitha qendrave ekonomike” në Lindjen e Mesme.
“Ne po i themi armikut se nëse vendos të sulmojë qendrat tona kryesore, ne do të sulmojmë të gjitha qendrat ekonomike në rajon”, tha Ebrahim Jabbari.
Më pas ai trajtoi pasojat ekonomike të përgjigjes së Iranit ndaj sulmit amerikano-izraelit ndaj atij vendi.
“E kemi mbyllur Ngushticën e Hormuzit. Aktualisht, çmimi i naftës është mbi 80 dollarë dhe së shpejti do të arrijë në 200 dollarë”, e citoi atë agjencia iraniane e lajmeve ISNA, ndërsa çmimi i naftës Brent u rrit mbi 85 dollarë për herë të parë që nga korriku i vitit 2024.
