Tornadot dhe stuhitë e forta në Michiganin jugor të SHBA-së vranë të paktën katër persona dhe plagosën më shumë se një duzinë të premten, duke shkatërruar disa shtëpi dhe duke lënë qindra banorë pa energji elektrike, thanë autoritetet lokale.
Menjëherë pasi Shërbimi Kombëtar i Motit lëshoi paralajmërime për tornado për zonën të premten, video nga qytetet Three Rivers dhe Union City u postuan në mediat sociale duke treguar erëra jashtëzakonisht të forta që ngrinin çatitë e ndërtesave dhe transportonin mbeturinat në ajër.
Pamjet e mediave lokale treguan ndërtesa dhe makina të dëmtuara, si dhe shtylla, pemë dhe tabela trafiku të shembura.
Tre të vdekur dhe një duzinë të plagosur u raportuan në Qarkun Branch, që përfshin Union City, tha zyra e sherifit të qarkut.Një person u vra dhe disa të tjerë u plagosën në Qarkun Cass, njoftuan autoritetet lokale.”Shumë struktura të mëdha, duke përfshirë shtëpi dhe hambare veglash, pësuan dëme që variojnë nga dëmtime të mëdha strukturore deri në shkatërrim të plotë”, thuhej në një postim në faqen e internetit të Qarkut Cass.
Ndërprerjet e energjisë elektrike prekën qindra njerëz, thanë zyrtarët lokalë.”Ka shumë linja elektrike të rrëzuara, transformatorë të dëmtuar dhe pjesë të tjera të linjave të energjisë që përfunduan në tokë. Ana veriore e Liqenit Union pësoi dëmet më të mëdha me afërsisht dy milje linjash energjie të rrëzuara vetëm në atë zonë”, thuhej në një postim në faqen zyrtare të Union City në Facebook, duke shtuar se restaurimi i tyre mund të zgjasë disa ditë.
Guvernatorja e Miçiganit, Gretchen Whitmer, tha se kishte aktivizuar Qendrën Shtetërore të Operacioneve të Emergjencave për të monitoruar situatën.
“Shteti është i përgatitur të përmbushë të gjitha kërkesat për burimet e nevojshme, por ne ende nuk i kemi marrë ato. Duket se komuniteti lokal ka arritur të zgjidhë disa nga pasojat e stuhisë shkatërruese që goditi Michiganin jugperëndimor të premten pasdite dhe në mbrëmje”, tha për Reuters Clayton Cummins, një zëdhënës i Shërbimeve të Emergjencave dhe Policisë së Michiganit.
