Komuna e Mitrovicës së Jugut ka vendosur për herë të parë subvencionimin e prodhimit të qumështit për fermerët lokalë.
Kryetari i komunës, Faton Peci, ka bërë të ditur se fermerët e komunës do të përfitojnë 10 cent subvencion për çdo litër qumështi të prodhuar. Sipas tij, kjo mbështetje shënon një rritje nga 0 në 10 cent për litër dhe përbën një hap të rëndësishëm drejt fuqizimit të prodhimit vendor.
“Mbështetja për fermerët do të jetë e vazhdueshme dhe meritore. Zhvillimi i bujqësisë mbetet prioriteti ynë,” është shprehur ai, duke theksuar se kjo masë është vetëm fillimi i një qasjeje më të gjerë për mbështetjen e bujqësisë në komunë.
Sipas njoftimit, kjo skemë subvencionimi synon të rrisë prodhimin e qumështit, të përmirësojë kushtet e fermerëve dhe të nxisë zhvillimin ekonomik lokal në Mitrovica e Jugut.
