Lideri i AAK-së, Ramush Haradinaj ka përkujtuar 27 vjetorin e Masakrës së Belegut ku mbetën të vrarë 49 shqiptarë.
Në një postim në Facebook, Haradinaj ka shkruar se edhe pas shumë vitesh familjarët e viktimave vazhdojnë të ndiejnë mungesën e të dashurve të tyre, duke përfshirë gra, pleq e fëmijë, të ekzekutuar pa mëshirë nga forcat serbe, edhe pse të paarmatosur.
Ai gjithashtu bëri homazhe në nderim të 14 bashkëluftëtarëve të rënë në Shishman të Bokës dhe kujtoi ditën e themelimit të Brigadës 137 “Gjakova”.
Haradinaj theksoi se shteti i Kosovës është fituar me shumë gjak e sakrificë dhe se e vërteta e luftës çlirimtare nuk mund të shtrembërohet.
“Serbia kishte mision shfarosjen tonë si popull, ndërsa fundin atij synimi i dhanë trimat e UÇK-së në tokë dhe NATO në qiell e udhëhequr nga Amerika. Çdo përpjekje për ta ndryshuar këtë të vërtetë është e dështuar dhe kushdo që tenton ta bëjë këtë, do të mbetet me turp.Lavdi të rënëve për liri!”, ka shkruar tutje Haradinaj.
