Serbia ka rënë dakord me Rusinë për tre muaj shtesë furnizimesh me gaz “me kushte shumë të favorshme”, tha të hënën presidenti serb
Aleksandar Vuçiç , dhe marrëveshja u konfirmua nga mediat ruse, pa dhënë detaje, duke cituar një deklaratë të Kremlinit mbi një bisedë telefonike midis presidentëve të të dy vendeve.Biseda telefonike u zhvillua me iniciativën e palës serbe, konfirmoi Kremlini.
“Ne morëm gaz në të njëjtat kushte – gjashtë milionë metra kub në ditë”, tha Vuçiç sot për mediat e Beogradit, duke theksuar se ekziston ‘fleksibilitet’ për të importuar më shumë gaz, nëse është e nevojshme.
-Çmimi mbetet sipas formulës së naftës, që do të thotë – shumë më i ulët se çmimi i bursës, dhe në Evropë ndoshta do të jemi vendi i dytë ose i tretë me çmimin më të ulët të gazit, tha Vuçiç.Ai më parë deklaroi se Serbia aktualisht po paguan 320 dollarë për gazin rus, ndërsa çmimi i tregut është 730 dollarë.Sipas një deklarate të Kremlinit, Vuçiç falënderoi Presidentin rus
Putin gjatë telefonatës “për furnizimet e vazhdueshme dhe të qëndrueshme të gazit rus, të cilat janë thelbësore për ruajtjen e sigurisë energjetike të Serbisë”.U diskutuan çështjet aktuale të partneritetit strategjik ruso-serb, duke përfshirë bashkëpunimin në sektorët e energjisë, naftës dhe gazit dhe bërthamor, si dhe përgatitjet për takimin e ardhshëm të prillit të Komitetit Ndërqeveritar ruso-serb për Bashkëpunim Tregtar, Ekonomik dhe Shkencor e Teknik, raportoi Sputnik rus, duke cituar një deklaratë të Kremlinit.
Sipas shërbimit për shtyp të kreut të shtetit rus, presidenti serb “dha vlerësimin e tij për situatën në Ballkan” dhe të dyja palët theksuan “rëndësinë themelore të Rezolutës 1244 të Këshillit të Sigurimit të OKB-së për zgjidhjen e çështjes së Kosovës” dhe “nevojën për të siguruar të drejtat e Republikës Srpska brenda Bosnjës dhe Hercegovinës në përputhje me Marrëveshjen e Dejtonit”.
Vuçiç deklaroi sot se pati një “bisedë thelbësore, të mirë dhe konstruktive” me Putinin për të gjitha çështjet që lidhen me bashkëpunimin midis Beogradit dhe Moskës, duke filluar nga mjekësia, farmacia dhe vaksinat, deri te pjesëmarrja e hekurudhave ruse në projekte në Serbi.Ai deklaroi se “e prezantoi Putinin edhe me aleancën e Prishtinës, Tiranës dhe Zagrebit”. Në ditët e mëparshme, Vuçiç vazhdimisht pohoi se bashkëpunimi ushtarak midis Kroacisë, Shqipërisë dhe Kosovës përbën një kërcënim për Serbinë.
