Grupi për Studime Juridike dhe Politike (GLPS) ka reaguar të enjten pas vendimit të datës 30 mars 2026 të marrë nga Kryesia e Kuvendit të Republikës së Kosovës për rishpalljen e konkursit për pozitën e Sekretari i Kuvendit, duke e konsideruar të paligjshëm.
GLPS ka reaguar edhe më herët për këtë çështje me datë 5 mars, duke i bërë me dije Kuvendit se procesi i rekrutimit është monitoruar në të gjitha fazat e tij dhe nuk janë evidentuar shkelje që do të cenonin ligjshmërinë apo meritokracinë e këtij procesi.
“Ky vendim në vetvete përcillet me një sërë shkeljesh ligjore duke filluar nga dështimi i Kryesisë për të përzgjedhur njërin nga kandidatët e ligjshëm për Sekretar të Përgjithshëm, anashkalimi me votë i një procesi të ligjshëm edhe pse legjislacioni në fuqi nuk e jep këtë lloj autorizimi që Kryesia mund të vendos që asnjëri kandidat mos të emërohet, dhe rishpallja e konkursit pa u përfunduar procedura e cila është e ligjshme”, thuhet në reagim.
Sipas GLPS-së, anulimi i këtij procesi mbi bazën e vetme të mungesës së votave dhe pa u plotësuar dhe verifikuar asnjë shkelje ligjore që qon në paligjshmëri të këtij procesi përbën një precedent të rrezikshëm “që minon drejtpërdrejt parimet themelore të shërbimit civil siç janë: meritokracia, profesionalizmi, depolitizimi dhe mosdiskriminimi”.
“Për më tepër, një veprim i tillë cenon të drejtat dhe pritshmëritë e ligjshme të kandidatëve fitues të këtij procesi dhe dekurajon kandidatët që të konkurrojnë për këtë pozitë në të ardhmen”, thuhet në reagim.
GLPS konsideron se në këtë rast roli i Kryesisë është në cilësinë e mbikëqyrësit të drejtpërdrejt të përcaktuar sipas legjislacionit për zyrtarët publik dhe kurrsesi si trup politike e cila ka diskrecion politik që me votë mund të shmang një proces të ligjshëm të rekrutimit.
“Mbi bazën e këtij precedenti të paligjshëm mund të vijmë në situata të përsëritura në të ardhmen që shumë procedura të rekrutimit të dështohen qëllimisht nga Kryesia mbi bazën e – mungesës së votave”, thuhet më tej.
GLPS i bën thirrje Kryesisë së Kuvendit që të rishqyrtojë këtë vendim dhe të veprojë në përputhje me ligjin, duke përmbyllur procesin përmes emërimit të njërit nga kandidatët fitues.
“Çdo veprim tjetër përveç këtij, jo vetëm që është i paligjshëm, por përbën edhe cenim të rendit juridik dhe të rregullave dhe parimeve të pranimit në shërbimin civil”, thuhet në fund të reagimit të Grupit për Studime Juridike dhe Politike.
