Tri partitë opozitare, PDK, LDK dhe AAK, përmes një shkrese të përbashkët, kanë kërkuar të hënën nga kryetarja e Komisionit për të Drejtat e Njeriut, Barazi Gjinore, Punë, Familje, Vlerat e Luftës Çlirimtare dhe Peticione, Fatmire Kollçaku, që urgjentisht të thërrasë mbledhjen e këtij komisioni.
Për këtë ka njoftuar deputeti i PDK-së, Artan Behrami, i cili ka thënë se komisioni do të mblidhet nesër në ora 10:00.
Në kërkesën e adresuar te kryetarja e komisionit, Fatmire Kollçaku, thuhet se në vitet e fundit Kosova po përballet gjithnjë e më shpesh me tendenca për rishkrim dhe deformim të së vërtetës historike, përmes interpretimeve që, sipas tyre, shtrembërojnë ngjarje të rëndësishme dhe krijojnë narrativa që bien ndesh me realitetin e dokumentuar.
Sipas shkresës, ekspozita e shfaqur në Prishtinë ka nxitur shqetësim të thellë publik për mënyrën e trajtimit të ngjarjeve të luftës, ndërsa përmbajtja e saj cilësohet si devijim nga e vërteta historike, duke paraqitur në mënyrë të dëmshme masakrat dhe episodet e ndjeshme të luftës.
Në dokument thuhet se një qasje e tillë rrezikon të relativizojë krimet e kryera, të deformojë narracionin historik dhe të lëndojë rëndë ndjenjat e familjeve të viktimave.
Për këtë, opozita ka kërkuar që komisioni të mblidhet urgjentisht dhe të ftojë në raportim Andin Hotin, në cilësinë e ministrit për Punë, Familje dhe Vlerat e Luftës Çlirimtare, me qëllim sqarimin e procedurave të ndjekura për miratimin, financimin dhe promovimin e kësaj ekspozite nga MPJ, Kuvendi dhe institucione tjera, si dhe vlerësimin e përgjegjësisë institucionale dhe individuale për përmbajtjen e saj.
Kërkesa e përbashkët është nënshkruar nga Sala Jashari, Armend Zemaj, Albana Bytyqi dhe Artan Behrami.
