Lajmi për zbulimin e eksplozivëve pranë infrastrukturës së gazit që lidh Serbinë dhe Hungarinë zuri një hapësirë të konsiderueshme në median hungareze, e cila i qaset kësaj ngjarjeje nga këndvështrime të ndryshme, nga ajo e sigurisë deri te ajo politike.Edhe pse qasjet ndryshojnë, shumica e mediave hungareze kanë të përbashkët vlerësimin se ky është një incident serioz me pasoja potencialisht të mëdha për sigurinë energjetike të rajonit.
Index.hu: incident sigurie dhe reagim emergjent i autoriteteve
Portali Index.hu përqendrohet në aspektin e sigurisë dhe reagimin e autoriteteve hungareze, duke vënë në dukje se Kryeministri Viktor Orbán thirri menjëherë Këshillin e Mbrojtjes pasi u informua për incidentin.Në raportimin e tyre, theksohet se kjo është një “infrastrukturë kritike gazi” që është me rëndësi kyçe për furnizimin me energji të Hungarisë, duke vënë në dukje se hetimi është duke vazhduar dhe se aktualisht nuk ka informacion zyrtar në lidhje me autorët.
Është e rëndësishme të theksohet se shumica dërrmuese e mediave hungareze është nën kontrollin de facto të Fidesz-it.
24.hu: reagime politike dhe spekulime rreth sfondit
Portali 24.hu i qaset më gjerësisht temës, duke përcjellë reagimet e opozitës, veçanërisht të liderit Peter Magjar, i cili pretendon se ka pasur paralajmërime më parë se incidenti mund të ndodhte.
Tekstet e tyre përmendin gjithashtu spekulime rreth “operacioneve të mundshme me flamur të rremë”, si dhe pyetjen nëse incidenti ka të bëjë me zgjedhjet e ardhshme në Hungari.
Telex.hu: Ton i kujdesshëm dhe theks mbi të panjohurat
Telex.hu mban një ton më të kujdesshëm dhe analitik, duke vënë në dukje se shumë detaje janë ende të panjohura. Fokusi është në faktin se u gjetën eksplozivë, por pa nxjerrë përfundime rreth motiveve apo atyre që janë përgjegjës.
Ky portal thekson nevojën për të pritur rezultatet e hetimit dhe shmang spekulimet, ndërsa kujton rëndësinë e rrugës së gazit përmes Serbisë për sigurinë energjetike të Hungarisë.
Magyar Nemzet: Siguria dhe interesi kombëtar
Gazeta pro-qeveritare Magyar Nemzet e sheh incidentin kryesisht si një çështje sigurie kombëtare, duke theksuar rëndësinë e mbrojtjes së infrastrukturës energjetike.
Raportet theksojnë nevojën për një reagim dhe bashkëpunim vendimtar me Serbinë, ndërsa i kushtohet më pak vëmendje polemikave politike.
444.hu: Një skenar i njohur
Portali 444.hu u jep më shumë hapësirë toneve dhe analizave kritike, duke përfshirë pikëpamjet e ekspertëve të sigurisë të cilët tregojnë se skenarë të ngjashëm janë përmendur më parë në publik.
Tekstet e tyre vënë në pikëpyetje mundësinë e instrumentalizimit politik të incidentit, veçanërisht në kontekstin e fushatës zgjedhore.
Teksti i faqes së internetit 444.hu pretendon se autoritetet në Serbi po përdorin përsëri një skenar tashmë të njohur me “autorë të panjohur” dhe bomba të dyshuara, këtë herë në kontekstin e incidentit në tubacionin e gazit Turk Stream. Pas zbulimit të sendeve të dyshimta, Vuçiç dhe Orban dolën shpejt me deklarata dramatike, dhe në Hungari, pa hetim, menjëherë u fajësua Ukraina. Autoritetet serbe më pas njoftuan se eksplozivi nuk kishte të bënte fare me Ukrainën, por se ishte pajisje amerikane dhe një person i lidhur me migrantët. Autori arrin në përfundimin se situata të tilla janë parë tashmë në Serbi dhe se publiku po e njeh gjithnjë e më shumë modelin e “kërcënimeve” të dobishme politikisht.
“Serbia, pra Presidenti Vuçiç dhe shërbimi sekret serb, kanë qenë aktorë, porositës dhe organizatorë të vazhdueshëm të veprimeve të ngjashme në dekadën e fundit. Pothuajse çdo vit, mediat serbe bëjnë bujë për faktin se “autorët e panjohur” kanë lënë eksplozivë ose armë në thasë, makina ose pranë rezidencës presidenciale. Aspak për t’u habitur…” pohon autori i tekstitt .
