Anëtarët e Parlamentit Evropian nga grupi i të Gjelbërve dhe Renew Europe kërkuan sot një reagim urgjent dhe të qartë nga Komisioni Evropian për shkak të përkeqësimit të situatës në Serbi, rënies së sundimit të ligjit, standardeve demokratike dhe të drejtave themelore, me vlerësimin se përgjigja nga Brukseli duhet të përfshijë pezullimin e financimit.Në një letër drejtuar Presidentes së Komisionit Ursula von der Leyen dhe Kolegjit të Komisionerëve, eurodeputetët Vladimir Prebilič dhe Sandro Goci paralajmërojnë se ngjarjet e fundit në Serbi shënojnë një përshkallëzim të ndjeshëm të erozionit të normave demokratike.
Shqetësim i veçantë shprehet për veprimet e policisë në Universitetin e Beogradit, duke përfshirë bastisjet, sekuestrimin e dokumenteve të brendshme dhe shënjestrimin publik të Rektorit Vladan Đokić.
Këto veprime, të cilat u transmetuan drejtpërdrejt nga mediat pro-qeveritare, përfaqësojnë një përpjekje të qartë për të frikësuar institucionet akademike dhe për të heshtur zërat kritikë, sipas deklaratës së Partisë Demokratike Evropiane.
Një vend kandidat për anëtarësim duhet të respektojë standardet e autonomisë universitare, procedurës së drejtë dhe sundimit të ligjit, dhe ajo që po ndodh në Serbi është “thellësisht e papajtueshme me standardet evropiane”.Letra drejtuar Komisionit Evropian dënon fuqimisht deklaratat e fundit të Ministrit të Informacionit dhe Telekomunikacionit të Serbisë, Boris Bratina, i cili sugjeroi që policia të përdorë forcë vdekjeprurëse kundër studentëve, duke kërkuar dorëheqjen e menjëhershme të ministrit.
Në deklaratë, eurodeputetët mbështesin rektorin e Universitetit të Beogradit, Vladan Đokić, dhe lëvizjen studentore, kërkesat e të cilëve për përgjegjësi, transparencë dhe respekt për parimet demokratike i konsiderojnë legjitime.
“E vetmja rrugë e besueshme përpara është organizimi i zgjedhjeve të lira dhe të ndershme, por ato nuk mund të mbahen në kushtet aktuale”, thanë deputetët dhe i bënë thirrje Komisionit të marrë një qëndrim të qartë, duke përfshirë pezullimin e financimit për Serbinë derisa të zbatohen reforma konkrete dhe të verifikueshme, veçanërisht kur bëhet fjalë për listën e votuesve dhe funksionimin e duhur të Organit Rregullator për Median Elektronike.
“Një përgjigje e qartë, e vendosur dhe urgjente është e nevojshme për të ruajtur vlerat evropiane dhe për të mbështetur qytetarët e Serbisë në përpjekjet e tyre për demokraci dhe sundim të ligjit”, përfunduan deputetët.
