Kreu i Kishës Katolike, Papa Leo XIV, lëshoi një mesazh të fortë në lidhje me përshkallëzimin e dhunës në rajonet e asaj që ai e quajti Lindja e Krishterë, duke theksuar se është “dhuna absurde dhe çnjerëzore” që po prek gjithnjë e më shumë vendet e shenjta.Në një postim në rrjetin social X, Papa deklaroi se hapësirat e shenjta janë përdhosur nga “blasfemia e luftës dhe brutaliteti i biznesit”, me anë të të cilave, siç paralajmëroi ai, jetët njerëzore lihen pas dore dhe reduktohen në dëme kolaterale të interesave personale.
“Por asnjë përfitim nuk mund të jetë i vlefshëm sa jeta e më të dobëtve, fëmijëve apo familjeve. Asnjë qëllim nuk mund të justifikojë derdhjen e gjakut të pafajshëm”, tha Papa.
Ai theksoi veçanërisht se Zoti nuk bekon asnjë konflikt dhe se ata që ndjekin Krishtin nuk mund të jenë në anën e atyre që dikur përdornin shpatën dhe sot hedhin bomba.
“Veprimi ushtarak nuk do të krijojë hapësirë për liri dhe as nuk do të sjellë një kohë paqeje, e cila vjen ekskluzivisht nëpërmjet forcimit me durim të bashkëjetesës dhe dialogut midis kombeve”, theksoi ai.
Papa Leo XIV iu referua gjithashtu pabarazive ekonomike globale, duke theksuar se qindra miliona njerëz në mbarë botën jetojnë në varfëri ekstreme, ndërsa pasuria joproporcionale është në duart e një pakice.
“Është një skenar i padrejtë që na detyron të shqyrtojmë veten dhe të angazhohemi për ndryshim. Shkaku i pabarazisë nuk është mungesa e burimeve, por nevoja për një shpërndarje më të drejtë të pasurisë, e cila duhet të arrihet me ndjenjë morale dhe ndershmëri”, përfundoi Papa.
