Punimet ndërtimore për segmentin nga Kriva Pallanka deri te tuneli ndërmjet Bullgarisë dhe Maqedonisë së Veriut, pjesë e linjës hekurudhore të Korridorit 8, pritet të fillojnë gjatë verës. Në dhjetë ditët e ardhshme pritet të shpallet procedura e prokurimit publik për përzgjedhjen e zbatuesit, deklaroi para gazetarëve zëvendëskryeministri dhe ministër i transportit i Republikës së Maqedonisë së Veriut, Aleksandër Nikolloski, sipas njoftimit të Agjencisë Telegrafike Bullgare.
Sot në Shkup po zhvillohet një takim pune me përfaqësues të Komisionit Evropian dhe të Delegacionit të Bashkimit Evropian në Shkup, i lidhur me ecurinë dhe planet për projektet e Korridorit Panevropian të transportit № 8, i cili lidh Detin Adriatik me Detin e Zi përmes Shqipërisë, Maqedonisë së Veriut dhe Bullgarisë.
