Shtetet e Bashkuara njoftuan të premten se po përgatiten të evakuojnë me aeroplan pasagjerët amerikanë nga anija turistike MV Hondius e prekur nga hantavirusi, e cila është në rrugë për në Ishujt Kanarie.”Departamenti i Shtetit po organizon një fluturim riatdhesimi për të lehtësuar kthimin e sigurt të pasagjerëve amerikanë nga ajo anije”, tha një zëdhënës i Departamentit të Shtetit.”Ne jemi në komunikim të drejtpërdrejtë me amerikanët në bord dhe jemi të gatshëm të ofrojmë ndihmë konsullore sapo anija të mbërrijë në Tenerife”, shtoi zëdhënësi.
Sipas listës së pasagjerëve, në bord ndodhen 17 amerikanë.CNN raportoi se amerikanët që riatdhesohen do të karantinohen në një qendër kombëtare të specializuar për pacientët me sëmundje infektive në Nebraska, një shtet rural në pjesën qendrore të vendit.Duke cituar burime anonime, kanali i lajmeve raporton se bëhet fjalë për një aeroplan special riatdhesimi që është përdorur më parë gjatë pandemisë Covid-19, duke shtuar se ekipe nga Qendrat për Kontrollin dhe Parandalimin e Sëmundjeve (CDC) janë të përfshira në operacion.
CDC tha të mërkurën se po “monitoronte nga afër situatën në lidhje me pasagjerët amerikanë në anijen turistike MV Hondius”, duke shtuar se “në këtë kohë, rreziku për popullsinë e SHBA-së është jashtëzakonisht i ulët”.Çfarë është Hantavirusi?
Hantavirusi përhapet kur grimcat e urinës dhe jashtëqitjes së brejtësve ndotin ajrin, si p.sh. pas pastrimit të zonave ku kanë jetuar minjtë. OBSH-ja vëren se virusi përhapet rrallë përmes kontaktit njerëzor.
Sëmundja fillon me simptoma të ngjashme me gripin, të cilat mund të çojnë në dështim të zemrës dhe mushkërive, me rreth 40 përqind të rasteve që përfundojnë me vdekje, vëren Reuters, duke cituar të dhëna nga Qendrat Amerikane për Kontrollin e Sëmundjeve.
Nuk ka ilaçe specifike për hantavirusin, kështu që trajtimi përqendrohet në kujdesin mbështetës, duke përfshirë ventilatorët në raste të rënda.
