Qeveria vendosi në seancën e saj të enjten të shesë kompleksin e Qendrës së Shkencës dhe Studimit Kumrovec dhe tokën përreth, pjesë e ish-Shtëpisë Përkujtimore të Kumrovecit të ndërtuar në vitin 1974 dhe e cila përdorej gjithashtu si qendër akomodimi dhe kongresesh.Shtëpia Përkujtimore, së bashku me ish-Shkollën Politike, e cila u shit gjithashtu disa herë, është shpallur një projekt me rëndësi strategjike për Kroacinë dhe që nga viti 2023 menaxhohet nga Ministria e Planifikimit Fizik, Ndërtimit dhe Pronës Shtetërore.
Me vendim të Qeverisë, shitja e kompleksit të Qendrës së Shkencës dhe Studimit do të kryhet nëpërmjet një tenderi publik duke mbledhur oferta me një çmim fillestar prej 2.7 milionë eurosh, që është vlera totale e tregut të pasurisë së paluajtshme, me qëllim rigjallërimin e kompleksit, forcimin e ofertës turistike të zonës dhe parandalimin e përkeqësimit të ambienteve dhe kostove të mirëmbajtjes së tyre.
Sipas planit hapësinor, zona është e destinuar për qëllime ekonomike dhe mikpritje-turizëm, pra hotel. Përveç çmimit të blerjes, blerësi do të jetë i detyruar të paguajë koston e përgatitjes së një raporti vlerësimi në shumën prej 2,833 eurosh, si dhe koston e përgatitjes së një certifikate energjitike në shumën prej 10,350 eurosh.
“Nga viti 1991 deri në vitin 2003, shtëpia përkujtimore shërbeu për të akomoduar personat e zhvendosur nga zonat e prekura nga lufta, dhe sot kërkohen investime të mëdha për ta vënë në funksion”, tha zëvendëskryeministri dhe ministri përkatës
Branko Baciq .Kompleksi përbëhet nga tre njësi ndërtimi të lidhura me një sipërfaqe totale prej 8,386 metrash katrorë, të cilat përfshijnë një sallë të madhe dhe një të vogël, një sallë leximi me bibliotekë, zyra biznesi, një pritje, një kuzhinë, një restorant, një pishinë dhe dhoma të tjera ndihmëse, si dhe një zonë akomodimi me 62 dhoma dhe ambiente shoqëruese.
Më 29 prill 2024, Departamenti i Konservimit në Krapina nxori një vendim duke e vendosur ndërtesën dhe pjesën më të madhe të tokës nën mbrojtje parandaluese për një periudhë katërvjeçare.
Në përputhje me Aktin për Mbrojtjen dhe Ruajtjen e Pronës Kulturore, përpara lidhjes së një kontrate blerjeje, do të kërkohet një deklaratë nga Bashkia e Kumrovecit dhe Qarku Krapina-Zagorje në lidhje me ushtrimin e së drejtës së parablerjes.
