Një dron rus, i nisur si pjesë e një sulmi natën në Ukrainë, u rrëzua në një ndërtesë banimi në qytetin rumun të Galaçi. Dy persona pësuan lëndime të lehta dhe disa banorë u evakuuan.Ministria rumune e Mbrojtjes tha se droni u gjurmua nga radari në hapësirën ajrore rumune përpara se të godiste çatinë e ndërtesës.
Pas përplasjes, shpërtheu një zjarr dhe policia dhe shërbime të tjera kompetente u dërguan në vendngjarje.
Galaçi ndodhet në Danub, në lindje të kufijve me Moldavinë dhe Ukrainën. Ushtria rumune ngriti dy avionë luftarakë F-16 dhe një helikopter, të cilëve iu dha leja për të operuar mbi objektiva, ndërsa banorëve të zonave të kërcënuara iu dërguan mesazhe paralajmëruese.
Sulmi vjen ndërsa Rusia vazhdon të përdorë raketa balistike me rreze të gjatë veprimi dhe dronë për të synuar rrjetin energjetik dhe qytetet e Ukrainës. Në të njëjtën kohë, Ukraina po përgatitet për bombardime të reja të rënda.
Presidenti ukrainas Volodymyr Zelensky tha të enjten se po u kërkon Shteteve të Bashkuara raketa shtesë Patriot për mbrojtje ajrore. Gjatë vizitës së tij në Suedi, ai tha se beson që Shtetet e Bashkuara të Amerikës duhet të veprojnë më shpejt.
“Ne jemi shumë këmbëngulës,” theksoi ai.
Sekretari i Përgjithshëm i Kombeve të Bashkuara, Antonio Guterres, paralajmëroi para Këshillit të Sigurimit të OKB-së se përshkallëzimi dhe intensifikimi i sulmeve kërcënon të dalë jashtë kontrollit, me “pasoja të panjohura dhe të paparashikuara”.
Ai bëri thirrje për më shumë diplomaci, ulje të menjëhershme të tensioneve dhe një armëpushim të plotë dhe pa kushte.
