Një ilaç kundër kancerit me tre agjentë mund të eliminojë plotësisht tumoret tek pacientët, sipas rezultateve të një prove klinike të kryer në 11 vende. Ilaçi i injektueshëm iu dha pacientëve, kanceri i të cilëve ishte përhapur ose ishte rikthyer dhe nuk po i përgjigjej më kimioterapisë ose imunoterapisë.
Ilaçi i tkurri tumoret te më shumë se një e treta e pacientëve, me ndryshime dramatike të vërejtura brenda pak javësh. Te 15 prej tyre, mjekët zbuluan se tumoret ishin zhdukur plotësisht.
Kevin Harrington , profesor i terapive biologjike të kancerit në Institutin e Kërkimeve të Kancerit (ICR) në Londër , tha: “Ky është një grup pacientësh me mundësi trajtimi jashtëzakonisht të kufizuara, kështu që ky nivel përfitimi është veçanërisht mbresëlënës.”
Harrington, i cili është gjithashtu onkolog klinik në Royal Marsden NHS Foundation Trust , vuri në dukje: “Ky trajtim ka potencialin t’u sjellë dobi mijëra pacientëve çdo vit.”
Ilaçi tani po vlerësohet në rreth 60 prova klinike .
Efektet anësore të lehta deri të moderuara
Injeksioni “i zgjuar” e shënjestron kancerin në tri mënyra: bllokon EGFR-in (receptorin e faktorit të rritjes epidermale), një proteinë që ndihmon rritjen e tumoreve, dhe rrugën MET , të cilën qelizat kancerogjene shpesh e përdorin për t’iu shmangur trajtimit. Gjithashtu aktivizon sistemin imunitar për të sulmuar tumorin.
Ndryshe nga shumë trajtime të kancerit, ilaçi jepet me një injeksion të vogël nënlëkuror në vend të intravenoz, duke e bërë trajtimin më të shpejtë, më të përshtatshëm për pacientët dhe më të lehtë për t’u administruar në ambiente ambulatore. Shumica e efekteve anësore ishin të lehta deri të moderuara dhe më pak se 1 në 10 pacientë ndërprenë trajtimin.
Burimi: Guardian
