Qytetarët e Malit të Zi nuk mund të kalojnë kufirin me Serbinë sonte në mbrëmje, që është përgjigja e autoriteteve në Beograd ndaj dëbimit të më shumë se 80 qytetarëve serbë nga aeroporti i Tivatit për rrezikimin e sigurisë kombëtare malazeze, shkruajnë mediat e Podgoricës.Sipas gazetës Vijesti, deri në orën 19:30, asnjë malazez nuk ka kaluar në Serbi përmes pikave kufitare Gostun, Jabuka dhe Draçenovac.Burimi i gazetës pohon se kjo është një “masë e përkohshme që do të zgjasë pak kohë”.
Radiotelevizioni i Malit të Zi shkruan se trafiku në pikat kufitare është i vështirësuar dhe kontrollet e kryera nga policia kufitare serbe janë “të detajuara”. Në videon e MUP-it të Serbisë nga pika kufitare e Gostunit, mund të shihet një radhë e gjatë makinash që presin të hyjnë në Serbi.Sipas burimit të RTCG-së, qytetarëve të Malit të Zi u rekomandohet që të monitorojnë trafikun në pikat kufitare drejt Serbisë në kohë reale përmes kamerave nga pikat kufitare dhe të kërkojnë informacion zyrtar nga Ministria e Brendshme e Serbisë.
Mediat malazeze raportuan më herët të mërkurën se policia kishte ndaluar hyrjen në vend për individë nga Serbia që kishin udhëtuar për në Tivat për shkak të dyshimeve për aktivitete subversive përpara samitit BE-Ballkani Perëndimor, në të cilin do të marrë pjesë edhe Presidenti serb
Aleksandar Vuçiç.Të gjithë pasagjerët me aeroplan çarter nga ai fluturim u kthyen më vonë në Beograd me të njëjtin fluturim, tha policia.
Gazeta Vijesti pohon se midis tyre ka persona të akuzuar për vepra të rënda penale, të cilët mediat dhe aktivistët e opozitës në Serbi i kanë etiketuar për vite me radhë si të afërt me qeverinë e Vuçiçit.
Partia e tij në pushtet, Partia Progresive Serbe, i punëson ata për tubime, sigurimin e ambienteve të partisë dhe organizimin e protestave në mbështetje të autoriteteve.
