Premtime për ulje të kostos së jetesës, rritje të pagave dhe pensioneve, si dhe investime në sektorët kyçë të vendit.
Këto ishin disa nga zotimet e paraqitura në tubimin përmbyllës elektoral në Prishtinë nga kandidati i PDK-së për kryeministër, Bedri Hamza.
Ai tha se fokusi i programit të tij qeverisës do të jetë zhvillimi ekonomik dhe përmirësimi i mirëqenies së qytetarëve, ndërsa u bëri thirrje votuesve që më 7 qershor ta mbështesin vizionin e tij për qeverisjen e vendit.
Hamza tha se programi i tij është i orientuar drejt zhvillimit ekonomik dhe mirëqenies sociale, duke premtuar uljen e kostos së jetesës, rritjen e pagave dhe pensioneve për të gjitha kategoritë, si dhe mbështetje më të madhe për bizneset dhe prodhuesit vendorë.
“Nga dita e par e qeveris sonë do te jete qytetaret do ta ulim TVSH do ti rrisim paga pensionet do të investojmë ne energji spitale e drejtësi. Ekonomia është buka ne tavolinë, është çmimi i vajit, i qumështit, është dinjiteti i pensionistit”, ka thënë Hamza.
Ai u zotua gjithashtu për një sistem shëndetësor më cilësor, me shërbime më të shpejta dhe më të qasshme për qytetarët, si dhe për avancimin e arsimit përmes investimeve që do të rrisin konkurrueshmërinë dhe do të krijojnë më shumë mundësi për të rinjtë në vend.
“Nëse je i lodhur nga çmimi i lart voto për ndryshim, nëse je biznes voto për ndryshim, nëse je e ri voto për ndryshim, nëse je ndërmarrës voto për ndryshim, nëse donë Kosovë normale voto për ndryshim”, ka thënë Hamza.
Në përmbyllje të tubimit, Hamza u bëri thirrje qytetarëve që më 7 qershor t’i japin mbështetje programit të tij qeverisës, duke theksuar se synimi i tij është një Kosovë me me shumë zhvillim, vende pune dhe mirëqenie për të gjithë qytetarët.
