Kryetari i Prishtinës, Përparim Rama ka njoftuar se janë shpallur projektet fituese për “Memorialin Përkujtimor Adem Jashari” që do të zë vend në kryeqytet.
“Koncepti i vendit të parë, i përzgjedhur nga komisioni profesional vlerësues, do të marrë jetë në kryeqytetin e Kosovës, duke bartur me vete peshën e jashtëzakonshme kombëtare, historike dhe emocionale që përfaqëson figura e Komandantit Legjendar dhe familja historike Jashari”, ka shkruar Rama.
Ky memorial do të jetë i frymëzuar nga sakrifica e familjes Jashari. Rama ka thënë se ky memorial është vala e zërit që sfidoi frikën, pushtimin dhe vdekjen, për t’i dhënë Kosovës të drejtën të jetojë e lirë.
“Besa besë, vetëm një vdekje se tjetër s’ka në këtë jetë. Edhe një fjalë e mirë.”, ky memorial e shndërron zërin e tij në një simbol të përjetshëm të lirisë, që do të jehojë në kohë dhe në hapësirë. Sepse ka zëra që nuk shuhen kurrë. Ata jetojnë në kujtesën e një kombi dhe në zemrën e një shteti të lirë”, njofton ai në facebook.
