Një aksident trafiku me pasojë fatale ka ndodhur mbrëmë rreth orës 23:00 në rrugën nacionale Mitrovicë–Prishtinë, në segmentin rrugor që kalon në zonën e Vushtrrisë, njofton Policia e Kosovës.
Në aksident, sipas policisë, janë përfshirë një motoçikletë dhe një automjet. Si pasojë e lëndimeve të marra, ka humbur jetën drejtuesi i motoçikletës, një mashkull rreth 22 vjeç.
Me urdhër të prokurorit kompetent, trupi i pajetë i viktimës është dërguar në Institutin e Mjekësisë Ligjore për obduksion, thuhet në njoftim.
Policia dhe hetuesit e trafikut kanë dalë në vendin e ngjarjes dhe kanë nisur hetimet për të sqaruar rrethanat dhe shkaqet e aksidentit.
