Tre persona u vranë dhe pesë të tjerë u plagosën në një të shtënë me armë në një shkollë në Filipinet qendrore, tha policia filipinase të hënën.Policia tha se dy të dyshuar u arrestuan pas një të shtëne me armë në Shkollën e Mesme Kombëtare San Jose në qytetin Tacloban, që ndodhet në provincën Leyte.
Të shtënat ndodhën rreth orës 9 të mëngjesit sipas kohës lokale, tha Zyra e Policisë së Qytetit Tacloban, duke shtuar se një hetim është duke u zhvilluar për të përcaktuar rrethanat e incidentit.
Shefi i policisë Noelito Getigan u tha gazetarëve se të dyshuarit përdorën armë zjarri të kalibrit .38 dhe 9 mm në të shtënat.
Një i dyshuar, një student i mitur, u arrestua menjëherë pas incidentit, ndërsa tjetri u dorëzua më vonë te autoritetet, tha Getigan.
Policia tha se të plagosurit u dërguan në spitalet aty pranë, ndërsa personel shtesë u vendos në shkollë për të garantuar sigurinë e nxënësve, stafit, prindërve dhe komunitetit lokal.
Autoritetet i kanë kërkuar publikut të mos përhapë informacione të paverifikuara dhe të bashkëpunojë me hetuesit.
