Evropa përjetoi një tjetër ditë me vapë ekstreme të shtunën, dhe rekordet e temperaturave u thyen përsëri në të gjithë kontinentin.
Gjermania vendosi një rekord të ri temperaturash për të dytën ditë radhazi, duke arritur në 41.5 gradë Celsius, treguan të dhënat. Rekorde u thyen gjithashtu në Danimarkë dhe Republikën Çeke të shtunën, ndërsa vala e paparë e nxehtësisë që nga fillimi i verës vazhdon të përhapet drejt veriut dhe lindjes së Evropës, duke prekur një numër gjithnjë e në rritje njerëzish.
Vlerësohet se rreth 150 milionë njerëz në Evropë aktualisht po përballen me temperatura më të larta se 35 gradë Celsius. Organizata Botërore Meteorologjike ka paralajmëruar se kjo valë e të nxehtit do të ketë pasoja të mëdha për shëndetin e njeriut dhe ekosistemet.
Vala e të nxehtit, e cila filloi në Gadishullin Iberik, tashmë po lidhet me vdekjen e qindra njerëzve gjatë javës së kaluar.
Shërbimi Meteorologjik Gjerman njoftoi se rekordi paraprak gjerman prej 41.5 gradësh u mat në Mockern-Drewitz, në shtetin federal lindor të Saksonisë-Anhalt. Kjo tejkaloi rekordin prej 41.3 gradësh, të vendosur vetëm një ditë më parë në Saarbrucken, pranë kufirit francez.
“Ky vapë nuk është mot i këndshëm vere. Kjo është një krizë shëndetësore”, tha politikania gjermane dhe ish-kryetarja e Partisë së Gjelbër Katrin Goering-Eckardt në rrjetin social X.
Në Berlin, policia përdori dy topa uji për të ftohur qytetarët.
Republika Çeke regjistroi gjithashtu temperaturën më të lartë. Në stacionin meteorologjik në Doksany, në veri të Pragës, u mat 40.8 gradë Celsius, njoftoi Shërbimi Kombëtar Meteorologjik (CHMI).
Në Danimarkë, një temperaturë e përkohshme prej 37 gradë Celsius u regjistrua në Odum, pranë Aarhus, duke thyer rekordin e mëparshëm prej 36.4 gradësh nga viti 1976. Zvicra theu rekordin për ditën më të nxehtë në qershor për të tretën ditë radhazi. Në qytetin verior të Bazelit, temperatura arriti në 39 gradë Celsius.
Që nga fillimi i valës së të nxehtit, numri i vdekjeve nga mbytja në Francë është rritur në të paktën 55. Vlerësohet se dy të tretat e atyre që kanë vdekur po notonin në zona të pambikëqyrura.
Sistemi i monitorimit të vdekshmërisë MoMo i Spanjës regjistroi 327 vdekje që mund të lidhen me nxehtësinë ekstreme nga e diela deri të enjten.
Evropa është kontinenti që po ngrohet më shpejt, të cilin shkencëtarët e lidhin me disa faktorë, duke përfshirë ngrohjen e përshpejtuar të Arktikut dhe ndryshimet në modelet e rrjedhave të ajrit.
Shkencëtarët nga organizata Botërore e Atribuimit të Motit deklarojnë se një valë e të nxehtit me këtë intensitet në një pjesë kaq të hershme të verës do të kishte qenë praktikisht e pamundur 50 vjet më parë dhe theksojnë se ndryshimi i klimës është përgjegjës për kushte të tilla ekstreme të motit.
Megjithatë, pritet që kushtet e motit më të freskët të fillojnë të zhvillohen nga perëndimi i kontinentit, të cilat gradualisht do të përhapen në lindje gjatë javës dhe do të sjellin freskinë e nevojshme.
