Një person u vra dhe një tjetër u plagos rëndë pas një incidenti me të shtëna që ndodhi dje, të dielën, në San Jose të Kalifornisë, ku funksionon një “zonë tifozësh” për transmetimin e ndeshjeve të Kupës së Botës , njoftoi policia lokale.
Në kohën e incidentit, nuk po transmetohej asnjë ndeshje e Kupës së Botës, pasi e vetmja ndeshje e ditës kishte përfunduar afërsisht në orën 14:00 sipas orës lokale.
“Njëra nga viktimat u shpall e vdekur në vendngjarje, ndërsa e dyta u dërgua në spital me lëndime kërcënuese për jetën “, tha policia e San Jose në një postim në platformën X.
Autoritetet po e trajtojnë rastin si vrasje , ndërsa disa rrugë përreth vendit të ngjarjes mbeten të bllokuara.
Incidenti ndodhi në Sheshin San Pedro , një nga vendet më të njohura në Zonën e Gjirit të San Franciskos, ku mijëra tifozë mblidhen për të ndjekur ndeshjet e Kupës së Botës në ekrane gjigante.
Deri më tani, rajoni ka pritur pesë ndeshje në turne, së fundmi ndeshjen e fazës eliminatore midis Bosnjës dhe bashkë-organizatorëve të Shteteve të Bashkuara të mërkurën e kaluar.
Zona ishte e rrethuar, baret ishin të mbyllura.
Një gazetar i Reuters që ishte në vendngjarje raportoi për një prani të fortë policie dhe shumë makina patrullimi, ndërsa pa ekipet e shpëtimit që transportonin një person në barelë.
Zona u rrethua menjëherë pas incidentit dhe shumica e bareve u mbyllën përkohësisht.
Një roje sigurie, e cila kërkoi të mbetej anonime sepse nuk ishte e autorizuar të fliste me median, tha se e pa burrin e plagosur të vetëdijshëm.
“Ai kishte dhimbje. Kishte gjak rreth qafës dhe pjesës së sipërme të shpinës. Oficerët po flisnin me personelin e sigurisë dhe dëshmitarët okularë”, tha ai.
Në zonën më të madhe të San Franciskos, disa dhjetëra zona tifozësh po funksionojnë për të akomoduar tifozët e Kupës së Botës.
Burimi: Reuters
