Policia spanjolle ka arrestuar një burrë që dyshohet se është një bos i mafias brenda organizatës kriminale italiane ‘Ndrangheta’ me seli në Kalabri, thanë autoritetet.Prokurorët italianë në Kalabri e identifikuan atë si Domenico Paviglianiti , i njohur edhe si “Don Mico”, për të cilin ishte lëshuar një urdhër arresti evropian në vitin 2022.
I dyshuari u ndalua në Soria, rreth 200 kilometra në verilindje të Madridit, njoftoi policia spanjolle të dielën në mbrëmje. Arrestimi erdhi pas muajsh hetimesh të përbashkëta nga autoritetet spanjolle dhe italiane, shtoi policia.
Paviglianiti akuzohet në Itali për krime të shumta, duke përfshirë krime të dhunshme, trafik droge dhe pastrim parash, tha policia spanjolle. Ai përballet me deri në 19 vjet burg, raportoi agjencia gjermane e lajmeve dpa.
Një video e postuar nga policia spanjolle në platformën sociale X tregon se ai po largohet me pranga, pa i bërë rezistencë.
Procedurat e ekstradimit në Itali pritet të fillojnë në ditët në vijim, në mënyrë që ai të vuajë dënimin atje, tha zyra e prokurorit të Kalabrisë.
Mediat spanjolle raportuan se 65-vjeçari është një nga të arratisurit më të kërkuar të Italisë dhe është arrestuar disa herë në Spanjë.
Ai u arrestua për herë të parë në vitin 1996 dhe u ekstradua në Itali në vitin 1999, duke kaluar rreth 20 vjet në burg përpara se të lirohej për shkak të një gabimi në llogaritjen e kohëzgjatjes së dënimit të tij, sipas gazetave El Mundo dhe El Pais. Ai u arrestua përsëri në Madrid në vitin 2021, por u lirua më vonë pasi dënimi i tij kishte skaduar.
Sipas gazetës El Mundo, ai bënte një jetë të qetë në Soria, një qytet me rreth 40,000 banorë, nën mbrojtjen e truprojave.
Ndranghetu konsiderohet si një nga organizatat mafioze më të fuqishme në botë dhe ishte në qendër të një konflikti të përgjakshëm klanesh në vitet 1980 dhe fillim të viteve 1990 që la rreth 700 të vdekur.
