Agjencia meteorologjike spanjolle Aemet ka lëshuar një paralajmërim të kuq për nxehtësi ekstreme në disa pjesë të tre rajoneve në Spanjën lindore, ku temperaturat maksimale mund të arrijnë midis 40 dhe 42 gradë Celsius.Alarmi i kuq, i cili mbulon pjesë të Katalonjës dhe rajonet e Valencias dhe Zaragozës, sinjalizon “rrezik të jashtëzakonshëm” me një “ndikim shumë serioz” potencialisht në pronë dhe popullsi.
Kjo valë e re e të nxehtit pritet të zgjasë deri të enjten. Ndër vendet më të prekura nga ndryshimet klimatike në Evropë, Spanja është mësuar tashmë me temperaturat e larta, por vitet e fundit ka përjetuar valë më të shpeshta dhe të rënda të të nxehtit gjatë verës, me vazhdimësi në rritje.
Vala aktuale e të nxehtit është e dyta këtë verë, pas qershorit, i cili ishte i dyti më i nxehti i regjistruar ndonjëherë, “me një temperaturë mesatare prej 3.2 gradë Celsius mbi normalen, e tejkaluar vetëm deri në verën e vitit 2025”, vëren Aemet.
Spanja përjetoi gjithashtu zjarret më të këqija pyjore në historinë e saj të kohëve të fundit verën e kaluar.
Frekuenca në rritje e valëve të të nxehtit dhe zvogëlimi i reshjeve në disa zona krijojnë kushte ideale për zhvillimin e zjarreve në pyje dhe zjarreve të bimësisë së ulët, të cilat ndizen më lehtë kur bimësia dhe toka janë jashtëzakonisht të thata.
