Procesi për përzgjedhjen e Kryeprokurorit të ri të Shtetit ka kaluar në fazën e radhës, pasi Këshilli Prokurorial i Kosovës (KPK) ka dorëzuar zyrtarisht në Presidencën e Republikës së Kosovës nominimin e Zejnullah Gashit për këtë pozitë.
Sipas njoftimit, nominimi i është përcjellë ushtrueses së detyrës së presidentes së Republikës së Kosovës, Albulena Haxhiu, së bashku me dokumentacionin e plotë që ka shoqëruar procesin e përzgjedhjes, nga hapja e procedurës deri te vendimmarrja përfundimtare e Këshillit.
Me dorëzimin e nominimit, procedura kalon në fazën e shqyrtimit nga Presidenca, ndërsa hapat e mëtejshëm pritet të zhvillohen në përputhje me kompetencat dhe afatet e përcaktuara me legjislacionin në fuqi.
