Një person ka humbur jetën dhe një tjetër është lënduar si pasojë e një aksidenti trafiku që ka ndodhur të dielën në fshatin Muhovc të Ferizajt.
Zëdhënësi i Policisë për rajonin e Ferizajt, Kanun Veseli, ka bërë të ditur se Policia ka pranuar informatën për aksidentin rreth orës 16:30.
Sipas informatave fillestare, në aksident është përfshirë një veturë me targa vendore, në të cilën ndodheshin dy persona.
Si pasojë e aksidentit, një person ka humbur jetën, ndërsa personi tjetër ka pësuar lëndime dhe është dërguar për trajtim mjekësor në Emergjencën e Ferizajt.
Njësitë policore të stacionit policor dhe Njësia Rajonale e Komunikacionit Rrugor kanë dalë në vendin e ngjarjes, ndërsa është njoftuar edhe Emergjenca Mjekësore.
Për rastin është njoftuar prokurori i shtetit, ndërsa njësitet e trafikut kanë ndërmarrë veprimet e nevojshme për hetimin e rastit.
Veseli ka bërë të ditur se për detaje të tjera Policia do të njoftojë përmes raportit vijues.
