Administrata Tatimore e Kosovës (ATK) ka përfunduar procesin e vlerësimit të kandidatëve për pozitat Inspektor i Nivelit Fillestar dhe Zyrtar për Mbledhjen e Borxheve.
Pas përfundimit të të gjitha fazave të vlerësimit, në përputhje me kriteret dhe procedurat e përcaktuara në konkurs, janë përzgjedhur gjithsej 39 kandidatë për këto dy pozita.
Sipas ATK-së, procesi i vlerësimit është monitoruar nga një komision i jashtëm, me qëllim garantimin e një procesi objektiv, transparent dhe të paanshëm, si dhe shmangien e mundësisë së subjektivitetit apo ndikimit të brendshëm institucional.
ATK ka bërë të ditur se përzgjedhja është bazuar në parimet e meritës, transparencës, profesionalizmit dhe trajtimit të barabartë të kandidatëve, duke marrë parasysh rezultatet e arritura dhe përmbushjen e kritereve të konkursit.
Listat me emrat e kandidatëve të përzgjedhur janë publikuar në ueb-faqen zyrtare të Administratës Tatimore të Kosovës.
“Kandidatët e pakënaqur me rezultatin përfundimtar, në përputhje me nenin 30, paragrafin 1 të Rregullores (MF) Nr. 01/2026, kanë të drejtë ankese ne Komisionin e Ankesave ne kuadër të Administratës Tatimore te Kosovës brenda tetë (8) ditësh nga dita e publikimit të rezultateve përfundimtare”, thuhet në njoftim.
ATK ka njoftuar se të gjitha ankesat e pranuara brenda afatit do të shqyrtohen sipas procedurave përkatëse.
