Rusia ka lëshuar një urdhër arresti ndërkombëtar për Conor Kennedy-n, djalin e Ministrit të Shëndetësisë të SHBA-së, Robert F. Kennedy Jr., për pjesëmarrjen e tij në luftën në Ukrainë gjatë vitit 2022.
Një gjykatë në Moskë miratoi arrestimin e Kenedit në mungesë dhe autoritetet ruse e akuzojnë atë për pjesëmarrje në operacione ushtarake kundër forcave ruse si mercenar.
Nëse ai arrestohet dhe ekstradohet në Rusi, sipas ligjit rus, ai përballet me një dënim prej shtatë deri në dhjetë vjet burg.
Kennedy foli publikisht për përvojën e tij në front pas kthimit në Shtetet e Bashkuara. Në një postim të tetorit 2022, ai shkroi se ishte thellësisht i prekur nga ajo që pa në Ukrainë dhe se kishte vendosur të largohej.
Edhe pse nuk kishte përvojë të mëparshme ushtarake, ai tha se ishte i përgatitur fizikisht, si dhe mendërisht, për të pranuar mundësinë e vrasjes.
“Isha i përgatitur të vdisja atje”, shkroi Kennedy, duke përshkruar përvojën e tij në Ukrainë.
Ai e përshkroi gjithashtu luftën në Ukrainë si një konflikt që, sipas mendimit të tij, do të formësojë fatin e demokracisë në këtë shekull.
Pasi iu bashkua Legjionit, Kennedy u dërgua në frontin verilindor, në zonën e Kharkivit, ku kaloi një pjesë të qëndrimit të tij në Ukrainë. Ai qëndroi në Ukrainë për gati dy muaj e gjysmë përpara se të kthehej në SHBA.
