Policia federale e Indisë ka ngritur akuza ndaj bashkëshortit dhe vjehrrës së modeles dhe aktores 33-vjeçare Twisha Sharma, e cila u gjet e vdekur në shtëpinë e saj në Bhopal më 12 maj, pesë muaj pas dasmës së saj. Vdekja e saj ka tërhequr vëmendje të gjerë mediatike , me raportime që variojnë nga vrasje deri te vetëvrasje, raporton BBC .
Byroja Qendrore e Hetimeve (CBI) ka akuzuar bashkëshortin e Twisha-s, Samarth Singh, një avokat, dhe nënën e tij Giribala Singh, një gjyqtare në pension, për nxitje në vetëvrasje dhe mizori. Të dy i kanë mohuar të gjitha akuzat. Nëna dhe djali u arrestuan menjëherë pas vdekjes së Twisha-s dhe janë në paraburgim.
Fletëpadia prej 600 faqesh, e paraqitur nga CBI në gjykatë javën e kaluar, thotë se viktima “nuk kishte zgjidhje tjetër veçse t’i jepte fund jetës për shkak të abuzimit të vazhdueshëm mendor që i ishte nënshtruar nga të dy të akuzuarit”. Hetimi, sipas fletëpadisë, zbuloi se Samarth kishte abuzuar dhe ofenduar vazhdimisht mendërisht Twisha pas martesës së tyre. Ai ishte në arrati për ca kohë pas vdekjes së saj.
Familja e Twishës: E detyruan të bënte abort
“Giribala Singh herë pas here e inkurajonte të birin të abuzonte psikologjikisht me gruan e tij”, thuhet më tej në dokument. Twisha Sharma ishte modele dhe aktore. Në vitin 2012, ajo fitoi konkursin e bukurisë dhe u bë Miss Pune në qytetin perëndimor të Indisë. Ajo ka marrë pjesë në fushata të shumta reklamuese dhe ka aktruar në një film në gjuhën telugu, si dhe ka punuar në marketing vitet e fundit.
Ajo u takua me Samartha-n në një aplikacion takimesh në shkurt të vitit 2025 dhe ata u martuan në dhjetor të të njëjtit vit. Rasti ka ngjallur interes të konsiderueshëm publik sepse në Indi, anëtarët e gjyqësorit pritet të jenë modele në shoqëri. Prindërit dhe vëllezërit e Twisha-s pretendojnë se burri dhe vjehrra e saj e torturuan për kërkesat e saj për prikë dhe se ajo përfundimisht u vra.
Nga ana tjetër, Giribala Singh i quajti akuzat të pabaza dhe pretendoi se Twisha kishte probleme me shëndetin mendor dhe i mori jetën vetes. Sipas familjes së saj, konflikti më i madh shpërtheu në prill pasi ajo mbeti shtatzënë. Ata akuzojnë bashkëshortin dhe vjehrrën e saj se i kanë vënë në dyshim moralin, duke pretenduar se ajo mbante fëmijën e dikujt tjetër dhe duke e detyruar të bënte abort në javën e parë të majit.
Avokati Giribale Singh: Nuk ka prova për ngacmim
Giribala Singh i ka mohuar akuzat dhe thotë se vetë Twisha këmbënguli për një abort sepse nuk donte fëmijë. Ankur Pandey, një avokat i familjes së Twishas, i tha BBC Hindi se CBI ka thirrur nene të aktit të nxitjes për vetëvrasje, që do të thotë se hetimi po e trajton vdekjen si vetëvrasje.
Ai shtoi se CBI ka kërkuar leje nga gjykata për të vazhduar hetimin. Hetuesit thanë se, nëse shfaqen prova të reja, ata do të hetojnë rolin e personave të tjerë dhe, nëse është e nevojshme, do të paraqesin një ndryshim në aktakuzë. Avokati i Giribale Singh, Inosh George Carlo, dha një deklaratë për BBC-në. “Hetimi nuk gjeti prova për akuzat e mëparshme për ngacmim për shkak të prikës dhe vrasje.”
Vjehrra e saj e akuzoi për imoralitet.
“E kemi thënë këtë që nga fillimi, por media nuk na ka dëgjuar kurrë”, tha ai. Disa ditë pas vdekjes së Twisha-s, ish-gjyqtarja u kritikua për faktin që foli në një konferencë për shtyp rreth shëndetit mendor të nuses së saj. Ajo e përshkroi atë si “liberale”.
Kur një gazetar e pyeti për sqarimin e termit, ajo u përgjigj duke përmendur “shthurje seksuale”. Deklaratat e saj shkaktuan reagime të forta negative në publik. Babai i Twishës e vlerësoi atë si një përpjekje për të diskredituar vajzën e tij.
