Në fillim të kësaj jave, piratët rrëmbyen një anije mallrash me flamur kamerunian pranë brigjeve të Puntland në Somali dhe e çuan atë në brigjet e rajonit Nugal, tha sot një zyrtar somalez.Anija M/V LUTUF u rrëmbye të hënën, rreth 3.5 milje detare nga Maraje në distriktin Ayle të Puntland, tha një zyrtar për Associated Press në kushte anonimiteti sepse nuk ishte i autorizuar të fliste publikisht për informacione të ndjeshme.
Anija, në pronësi të Polar Movement Shipping, mbante armë të destinuara për qendrën e stërvitjes ushtarake të Turqisë në Mogadishu, si dhe pajisje komunikimi dhe satelitore, tha zyrtari.”Në bord ndodheshin dhjetë anëtarë të ekuipazhit: gjashtë indianë, një shtetas turk, një gjeorgjian dhe dy personel sigurie serb”, tha zyrtari. Autoritetet turke nuk kanë komentuar ende për incidentin.
Tetë piratë, që besohet të jenë anëtarë të grupit që më parë mori pjesë në rrëmbimin e M/V Sward më 26 prill, e çuan anijen drejt bregdetit pranë Garmaal në distriktin Dangorajo të Puntland.
“Dy anije në pronësi turke iu afruan më vonë anijes së rrëmbyer, ndërsa helikopterë dhe dronë turq monitoruan zonën. Të martën, një varkë e vogël me dy burra iu afrua anijes së rrëmbyer dhe solli khat, një bimë stimuluese që shpesh përtypet në Somali”, tha zyrtari.
“Pasi anija u kthye në breg, pasoi një sulm ajror, duke vrarë katër burra dhe duke plagosur dy të tjerë”, tha zyrtari.
Rrethanat e sulmit, duke përfshirë se kush e kreu atë dhe nëse të vdekurit ishin të lidhur me rrëmbimin, nuk mund të verifikohen ende në mënyrë të pavarur. Gjithashtu, nuk dihet se çfarë ndodhi me anijen M/V LUTUF, ekuipazhin dhe ngarkesën e saj. Associated Press nuk mundi të konfirmonte në mënyrë të pavarur detajet e plota të akuzave të zyrtarit somalez.
