Rusia paralajmëroi të enjten se mund të sulmojë objektiva ushtarake britanike brenda dhe jashtë Ukrainës në përgjigje të sulmeve ukrainase ndaj objektivave brenda Rusisë, duke përdorur raketa britanike me rreze të gjatë veprimi.
Paralajmërimi, të cilin zëdhënësja e Ministrisë së Jashtme ruse, Maria Zakharova, e dha në një konferencë për shtyp në Moskë, është më i forti i këtij lloji që Rusia i ka dërguar deri më tani Britanisë, një shtet anëtar i NATO-s dhe aleat i fortë i Ukrainës.
Zakharova tha se Londra është “një hap larg” nga të qenit ligjërisht bashkë-autore në atë që ajo e quajti “terrorizëm” kundër civilëve rusë dhe se kjo do të kishte “pasoja katastrofike” nëse Britania nuk ndryshon kursin.
“Ne kemi paralajmëruar vazhdimisht se të gjitha objektet dhe pajisjet ushtarake britanike në Ukrainë dhe përtej kufijve të saj mund të jenë në shënjestër në përgjigje të sulmeve ukrainase në territorin rus të kryera me armë britanike”, tha ajo.
“Ne sugjerojmë që udhëheqja britanike ta analizojë edhe një herë me kujdes situatën dhe menjëherë, në mënyrën më vendimtare dhe të qartë, të braktisë linjën agresive të armikut, e cila mund të krijojë vetëm rrezikun e përshkallëzimit të konfliktit në një nivel krejtësisht të ri”, tha Zaharova.
Paralajmërimi erdhi një ditë pasi Rusia akuzoi Ukrainën për lëshimin e raketave britanike Storm Shadow në një qendër tregtare në qytetin rus të Donetskut në Ukrainën lindore, në një sulm që sipas saj ka plagosur civilë, përfshirë fëmijë.Kremlini tha të hënën se Britania po i shtonte metodikisht “benzinë zjarrit” pasi Londra njoftoi se do t’i lejonte Kievit qasje në teknologjinë sekrete për të nisur prodhimin e vet të raketave lundruese Storm Shadow, të cilat mund të përdoren për të goditur thellë brenda Rusisë. Franca tashmë ka rënë dakord të licencojë teknologjinë për raketën evropiane.
