Bashkimi Evropian shpreh keqardhje të thellë për vendimin e Këshillit Gjyqësor të Kosovës për të pranuar dorëheqjet e gjyqtarëve serbë të Kosovës, të cilat tashmë ishin tërhequr.
“Këto vendime duket se janë të papajtueshme me ligjin e Kosovës, procesin e rregullt ligjor dhe kërkesat e përgjithshme për sundimin e ligjit në Kosovë”, thuhet në komunikatën e lëshuar nga zëdhënësi i BE-së.
Sipas komunikatës, këto vendime gjithashtu bien ndesh me parimet e një gjyqësori multietnik, dëmtojnë besimin e komunitetit serb të Kosovës dhe minojnë përpjekjet për një rikthim të qëndrueshëm në institucionet e Kosovës. Bashkimi Evropian u bën thirrje të gjithë aktorëve përkatës që të krijojnë kushtet për një gjyqësor multietnik, në përputhje të plotë me ligjin e Kosovës, procesin e rregullt ligjor dhe zotimet e marra në kuadër të Dialogut të lehtësuar nga BE-ja.
“Sipas Kushtetutës së saj, Kosova është një shoqëri multietnike e qeverisur nga sundimi i ligjit dhe sistemi i saj i drejtësisë duhet të pasqyrojë diversitetin etnik të Kosovës”, thuhet në komunikatë. BE-ja rikujton se vazhdimisht i ka bërë thirrje Kosovës që të mundësojë riintegrimin e personelit gjyqësor serb të Kosovës, në përputhje me ligjet e Kosovës dhe marrëveshjet e arritura në kuadër të Dialogut.
Ndërkohë, Brukseli mirëpriti tërheqjen, më 15 korrik 2026, të dorëheqjeve të paraqitura nga gjyqtarët, prokurorët dhe stafi mbështetës serb i Kosovës.
