Një vajzë 5-vjeçare që u shpëtua nga rrënojat të premten (28/08) u ribashkua me prindërit e saj në spital , dy ditë pas përmbytjeve shkatërruese që goditën Nepalin .
Manisa e vogël po trajtohet në gjendje të qëndrueshme në Spitalin Mësimor të Katmandusë, tha një zyrtar i spitalit për BBC-në.
Shpëtimi i saj ndodhi në rrethana tronditëse.
Ekipet e shpëtimit po kërkonin të mbijetuar pranë Syambrubesi në rajonin Rasuva kur dëgjuan një zhurmë të dobët që vinte nga poshtë rrënojave. Fillimisht ata menduan se ishte një mace e bllokuar.
Ekipet e shpëtimit filluan të kontrollonin vendin e ngjarjes dhe të hiqnin rrënojat . Atëherë panë Manisën, të bllokuar nën rrënoja.
Dy orë për ta liruar atë
Sipas Sanju Khatri, një oficer policie me Forcën e Policisë së Armatosur të Nepalit, u deshën rreth dy orë për të liruar fëmijën.
5-vjeçarja ishte gjallë , por mezi reagonte kur u nxor jashtë.
Ekipi i shpëtimit kërkoi ndihmë me helikopter për ta transportuar menjëherë në spital, por kushtet e këqija të motit nuk e lejuan transportimin e saj ajror .
Kështu, shpëtuesit fillimisht e çuan atë në kampin e forcës, ku i dhanë ujë. Pas pak kohe, Manisa rifitoi vetëdijen dhe shpëtuesit filluan t’i jepnin ujë të zier orizi për ta ndihmuar të rifitonte forcën.
Ajo u ribashkua me prindërit e saj.
Vajza e vogël ishte dukshëm e tronditur nga ajo që kishte përjetuar , por të shtunën pasdite (29/08) ajo u transportua me helikopter në departamentin e urgjencës pediatrike të Spitalit Mësimor në Katmandu, ku u ribashkua me prindërit e saj.
Në një përditësim të mëtejshëm të dielën (30/08), spitali i tha BBC-së se 5-vjeçarja po shërohet dhe gjendja e saj është e qëndrueshme .
Me informacion nga BBC
