Presidenti rus Vladimir Putin zhvilloi bisedime me të dërguarit specialë të SHBA-së Steve Witkoff dhe Jared Kushner në Kremlin të shtunën . Takimi në Kremlin zgjati rreth tre orë, sipas mediave shtetërore ruse. Witkoff dhe Kushner u larguan nga Kremlini rreth orës 23:00 sipas kohës lokale. Nuk janë publikuar detaje mbi rezultatin e bisedimeve.Përpara takimit, Putin tha se situata me të cilën ai dhe të dërguarit amerikanë duhej të përballeshin “nuk ishte e thjeshtë”.
“Sigurisht që situata nuk është e thjeshtë”, u tha Putin zyrtarëve amerikanë.
Rusia dhe Ukraina kanë rënë dakord të ndalojnë sulmet ndaj Moskës dhe Kievit për tre ditët e ardhshme.
Presidenti i SHBA-së, Donald Trump, tha të premten se Uashingtoni ka një propozim të ri dhe konkret për t’i dhënë fund luftës në Ukrainë, e cila ka vazhduar për më shumë se katër vjet. Trump nuk paraqiti detajet e propozimit.
Presidenti ukrainas Volodymyr Zelensky tha se Witkoff dhe Kushner do të udhëtojnë për në Ukrainë pas vizitës së tyre në Moskë të dielën. Në një postim në Platformën X të shtunën, ai deklaroi se Rusia kishte sulmuar dy aeroporte ukrainase para mbërritjes së tyre në Kiev.
Pavarësisht kontakteve të reja diplomatike, ka ende dallime të mëdha midis Moskës dhe Kievit mbi kushtet për përfundimin e luftës.
Kremlini tha të premten se kërkesa e Putinit, sipas së cilës Ukraina duhet t’i lëshojë Rusisë të gjithë territorin e katër rajoneve ukrainase që Moska i konsideron të vetat dhe të heqë dorë nga anëtarësimi në NATO, mbetet “e palëkundur”.
