Policia e Kosovës ka ndërmarrë masa të sigurisë lidhur me zhvillimet e parapara për 16 shtator, kur pritet të shpallet verdikti përfundimtar i Gjykatës Speciale në Hagë ndaj ish-krerëve të UÇK-së.
Në kuadër të planifikimit, sot në Drejtorinë e Përgjithshme të Policisë së Kosovës është mbajtur takim informues dhe koordinues, ku është prezantuar plani dhe angazhimet policore për zhvillimet e mundshme.
Në takim kanë marrë pjesë drejtues të departamenteve dhe drejtorive rajonale të Policisë së Kosovës, ndërsa janë zhvilluar koordinime edhe me partnerët ndërkombëtarë, përfshirë KFOR-in, EULEX-in, Ambasadën Amerikane, Zyrën e BE-së dhe OSBE-në.
Policia ka bërë të ditur se do të angazhojë njësi policore për të garantuar sigurinë, rendin dhe qetësinë publike, si dhe mbarëvajtjen e aktiviteteve.
Varësisht nga zhvillimet dhe pjesëmarrja e qytetarëve, mund të ketë kufizime ose ndërprerje të përkohshme të qarkullimit në rrugët e prekura. Për këtë arsye, Policia ka paraparë edhe angazhimin e njësive të trafikut për riorientimin e qarkullimit në rrugë alternative, në rast nevoje.
Policia u ka bërë thirrje qytetarëve dhe pjesëmarrësve që të respektojnë udhëzimet e zyrtarëve policorë dhe të kontribuojnë që aktivitetet e 16 shtatorit të zhvillohen në mënyrë të qetë dhe të sigurt.
