Presidenti i SHBA-së, Donald Trump, deklaroi të hënën se Ukraina dhe Rusia kishin rënë dakord të ndalonin sulmet ndaj “objektivave energjetikë” të njëra-tjetrës, ndërsa çmimet e karburantit vazhduan të rriteshin në të gjithë botën.
“Ukraina ka rënë dakord të mos sulmojë objektivat energjetikë të Rusisë. Rusia ka rënë dakord të bëjë të njëjtën gjë!”, shkroi Trump në një postim në rrjetin e tij social Truth Social, duke pohuar se “rritja e çmimeve të naftës në mbarë botën është kryesisht për shkak të luftës midis Rusisë dhe Ukrainës, jo të Iranit”.
As Ukraina dhe as Rusia nuk e kanë konfirmuar arritjen e një marrëveshjeje të tillë, siç raporton gazeta Kyiv Independent . Zyra e Presidentit ukrainas Volodymyr Zelensky nuk i është përgjigjur ende një kërkese për koment.
Njoftimi i Trump erdhi vetëm një ditë pasi ai fajësoi drejtpërdrejt presidentin ukrainas për rritjen e çmimeve të naftës – përfshirë në SHBA, ku çmimi arriti një rekord prej 6.23 dollarësh për galon (1.65 dollarë për litër) gjatë fundjavës.
“Z. Zelensky duhet të bëjë një gjë. Ai duhet të ndalojë shkatërrimin e karburantit dizel në Rusi”, tha Trump të dielën. “Le të sulmojë objektivat, por jo karburantin dizel, sepse kjo shkakton mungesë të naftës”, shtoi ai. “Ne biseduam me z. Zelensky për këtë… Kjo nuk është pasojë e Lindjes së Mesme”.
Lufta e Trumpit kundër Iranit ka shkatërruar më shumë se 20 përqind të kapacitetit të rafinimit në Lindjen e Mesme dhe praktikisht ka mbyllur Ngushticën e Hormuzit, përmes së cilës kalonte më parë rreth një e pesta e furnizimit botëror me naftë.
Ndërkohë, Ukraina vazhdoi të sulmojë infrastrukturën e naftës së Rusisë si pjesë e një përpjekjeje më të gjerë për të ndërprerë furnizimin me karburant dhe për të ulur të ardhurat që Moska po përdor për të financuar luftën e saj kundër Ukrainës.
Fushata e sulmit, e cila është zgjeruar dhe intensifikuar shumë gjatë 12 muajve të fundit falë përparimeve në arsenalin e dronëve me rreze të gjatë veprimi të Ukrainës, ka qenë një instrument i rëndësishëm i presionit ofensiv të Kievit.
Kjo nuk është hera e parë që është propozuar një “armëpushim energjitik” i kufizuar në luftën e Rusisë kundër Ukrainës. Ideja që të dyja palët të ndalojnë sulme të tilla u ngrit vazhdimisht gjatë bisedimeve të pasuksesshme të paqes të ndërmjetësuara nga administrata Trump gjatë verës së vitit 2025.
Zelensky njoftoi të dielën se planifikon të diskutojë përfundimin e sulmeve ruse dhe ukrainase ndaj infrastrukturës energjetike dhe në Detin e Zi gjatë një takimi të mundshëm me presidentin amerikan javën e ardhshme në Nju Jork.
Takimi mund të mbahet në margjinat e Asamblesë së Përgjithshme të Kombeve të Bashkuara midis 21 dhe 23 shtatorit, nëse axhendat e dy presidentëve përputhen. Bisedimet do të zhvillohen në një kohë kur përpjekjet e udhëhequra nga SHBA-të për të arritur një marrëveshje më të gjerë paqeje mbeten të bllokuara nga pretendimet territoriale ruse.
“Jemi të hapur për një armëpushim detar, si dhe një armëpushim energjetik. Planifikoj t’i diskutoj të gjitha këto”, tha Zelensky në një intervistë me televizionin kombëtar ukrainas të dielën.
Reagimi i Rusisë ndaj propozimeve të fundit të Kievit ka qenë i përmbajtur deri më tani. Zëdhënësi i Kremlinit, Dmitry Peskov, u tha gazetarëve më 10 shtator se Kievi nuk po ofronte “një zgjidhje të përhershme që do të përmbushte plotësisht interesat (ruse)”, por thjesht po kërkonte një armëpushim në zonën që përfaqëson “thembrën e Akilit” të Ukrainës.
Pretendimet e Trump nga Truth Social u raportuan edhe nga disa media ruse, siç është e përditshmja e biznesit Kommersant , por pa informacion në lidhje me ndonjë reagim nga Kremlini.
