Ylli i muzikës kolumbiane Shakira nis sonte një seri prej 12 koncertesh në Madrid, duke i dhënë fund turneut të saj botëror “Las Mujeres Ya No Lloran”.Këngëtarja kthehet në Spanjë pas tetë vitesh dhe shfaqjet në kryeqytet fillojnë më 18 shtator dhe do të zgjasin deri më 11 tetor. Koncertet do të mbahen në një strukturë të përkohshme të ndërtuar posaçërisht “Stadiumi Shakira” në kompleksin muzikor Iberdrola, në lagjen Villaverde të Madridit.
Gjatë katër fundjavave, Shakira do të performojë 12 herë, më 18, 19, 20, 25, 26 dhe 27 shtator, dhe më 2, 3, 4, 9, 10 dhe 11 tetor. Organizatorët presin që më shumë se 600,000 njerëz do të vizitojnë gjithsej shfaqjet e saj, ndërsa vlerësohet se do të ketë rreth 55,000 vizitorë në hapësirë çdo ditë.
Kthimi në Spanjë ka një kuptim të veçantë për Shakirën, sepse ajo nuk ka performuar atje që nga viti 2018, kur mbajti koncerte si pjesë e turneut “El Dorado”. Ajo mbërriti në Madrid në fillim të kësaj jave, ku u prit nga shumë fansa në aeroport.
Përveç vetë koncerteve, mbërritja e Shakirës në Madrid është konceptuar si një lloj eventi kulturor. Kompleksi ka organizuar “Macondo Park”, një hapësirë kushtuar muzikës, gastronomisë, artit, letërsisë dhe aktiviteteve të tjera. Programi do të zgjasë me orë të tëra gjatë ditëve të koncerteve, dhe një pjesë e veçantë e mbrëmjes do t’i kushtohet traditës së karnavaleve të qytetit të saj të lindjes, Barranquilla.
Shakira nisi një turne botëror në vitin 2025 për të promovuar albumin “Las Mujeres Ya No Lloran”; i publikuar në vitin 2024. Albumi u frymëzua nga përvojat personale të këngëtares dhe fitoi çmimin Grammy për albumin më të mirë pop latin.
Turneu i saj do të përmbyllet kështu me një seri të madhe shfaqjesh në Madrid, ku Shakira do t’i prezantohet përsëri publikut spanjoll pas një pushimi të gjatë.
