Instituti Kombëtar i Shëndetësisë Publike të Kosovës (IKShPK) ka njoftuar se nga 16 prilli deri më 27 shtator 2026 janë konfirmuar 180 raste me fruth në Kosovë.
Sipas IKShPK-së, vetëm gjatë javës së fundit janë regjistruar tetë raste të reja, ndërsa mbi 95 për qind e rasteve të konfirmuara i përkasin personave të pavaksinuar me vaksinën MMR.
Instituti ka bërë të ditur se, krahas vaksinimit të rregullt sipas kalendarit kombëtar, është intensifikuar edhe vaksinimi i vonuar për fëmijët që nuk janë vaksinuar me kohë.
Sipas të dhënave të IKShPK-së, gjatë këtij viti janë vaksinuar më shumë se 3,176 fëmijë të moshës 2 deri në 5 vjeç.
IKShPK u ka bërë thirrje prindërve dhe qytetarëve që të vaksinojnë fëmijët, duke theksuar se vaksinimi mbetet masa më e rëndësishme për mbrojtjen nga fruthi dhe për parandalimin e përhapjes së sëmundjes.
