Deputeti boshnjak në Kuvendin e Kosovës, Bahrim Shabani, ka deklaruar se aktgjykimi i Dhomave të Specializuara ndaj ish-krerëve të UÇK-së është i papranueshëm.
“Shpreh respektin tim më të thellë për ta dhe për të gjithë ata që kanë luftuar për lirinë e vendit tonë. Vendimi i Hagës për ne është i papranueshëm”, tha Shabani në seancën e Kuvendit.
Ai u shpreh me shpresën që kjo çështje të përfundojë me lirimin e ish-krerëve të UÇK-së dhe kthimin e tyre pranë familjeve.
Shabani foli edhe për rëndësinë e ruajtjes së identitetit, gjuhës dhe traditës së komunitetit boshnjak në Kosovë, ndërsa theksoi se 28 Shtatori është një ditë për të kujtuar këto vlera.
Ai përshëndeti edhe vendimin e Kosovës për heqjen e vizave për qytetarët e Bosnjës e Hercegovinës dhe u bëri thirrje institucioneve të Bosnjës që të ndërmarrin një hap të ngjashëm për qytetarët e Kosovës.
Në fund të fjalimit, Shabani uroi komunitetin boshnjak për 28 Shtatorin – Ditën e Boshnjakëve.
