Paqja dhe siguria e të gjitha komuniteteve në Kosovë, si dhe stabiliteti në Ballkanin Perëndimor, ishin në fokus të takimit ndërmjet komandantit të KFOR-it, gjeneralmajor Roberto Vergori, dhe ministrit të Mbrojtjes së Shqipërisë, Ermal Nufi.
Sipas njoftimit të KFOR-it, në takim u riafirmua përkushtimi i përbashkët për paqen dhe bashkëpunimin ndërkombëtar, me qëllim të ruajtjes së sigurisë dhe stabilitetit në rajon.
Takimi shërbeu gjithashtu për vendosjen e kontakteve të drejtpërdrejta pas emërimit të Vergorit në krye të misionit të KFOR-it, si dhe për shkëmbimin e pikëpamjeve mbi bashkëpunimin e ndërsjellë.
